Бейнеу орталық аудандық ауруханасының директоры тағайындалды

Қазақстан Республикасы Денсаулық сақтау министрлігінің келісімімен Бейнеу орталық аудандық ауруханасы Байқау кеңесі мүшелерінің конкурс шешімі негізінде Маңғыстау облыстық денсаулық сақтау басқармасы басшысының міндетін атқарушы Есенғалиева Ләззат Қайырбайқызының бұйрығымен 2021 жыл 14 маусымынан бастап Бейнеу орталық аудандық ауруханасының директоры болып Абдуллаев Берік Алдоңғарұлы тағайындалды.

Берік Алдоңғарұлы 1981 жылы 14 наурызда Бейнеу селосында дүниеге келген.

1987-1998 жылдары Бейнеу селосындағы Ы.Алтынсарин атындағы орта мектепте білім алған.

1998 жылы Ақтөбе мемлекеттік медицина институтына оқуға түсіп, 2004 жылы М.Оспанов атындағы Батыс Қазақстан мемлекеттік медицина академиясын дәрігер мамандығы бойынша бітірген. Еңбек жолын 2004-2005 жылдар аралығында Қызылорда облыстық медицина орталығында дәрігер-интерн хирург болып бастаған.

12.05.2005-01.09.2005 жыл аралығында Бейнеу аудандық орталық ауруханасының жедел жәрдем бөліміне дәрігер-хирург болып жұмыс жасаған.

01.09.2005-31.12.2005 жыл аралығында Алматы қаласындағы Дәрігерлердің білімін жетілдіру институтында дәрігер анестезиолог-реаниматолог болып қайта дайындықтан өткен. 2006-2009 жылдар аралығында анестезиолог-реаниматолог болып, 2009-2012 жылдар аралығында хирург және анестезиолог-реаниматолог дәрігер болып,

2012-2015 жылдар аралығында аурухана бас дәрігерінің емдеу ісі жөніндегі орынбасары болып, 2015-2017 жылдар аралығында аурухана директорының міндетін атқарушы болған.

2017 жыл 5 қаңтарда емхана мен аурухана бірігуінен кейін директордың орынбасары болып тағайындалған.

2018 жыл 5 қыркүйектен бастап осы кезеңге дейін аурухана директорының орынбасары және директордың міндетін атқарушы болып қызмет атқарған.

Жоғары санатты хирург, бірінші санатты денсаулық сақтау ұйымдастырушысы.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.