Бас басылымның ерекше нөмірі

Ұлт ұстазы, алаш қайраткері Ахмет Байтұрсынұлы айтқандай, «Газет – халықтың көзі, құлағы һәм тілі. Адамға көз, құлақ, тіл қандай керек болса, халыққа газет сондай керек. Газеті жоқ жұрт басқа газеті бар жұрттардың қасында құлағы жоқ керең, тілі жоқ мылқау, көзі жоқ соқыр секілді» деген мағыналы сөзі ғасырға жуық уақыт өтсе де құндылығын жоймай келеді. Майлы қиян маңғаз Маңғыстау өңірінің бас басылымына айналған «Маңғыстау» газеті бүгінде 1973 жылдан бері өлкеміздің тыныс-тіршілігін өлке жұртшылығына жаңалық жаршысы бола үн қосып келеді.

Талай-талай аузы дуалы шешендердің, тағылымды тарихи тұлғалардың, дүлдүл сөз жүйріктерінің, өресі биік майталмандардың рухани, тарихи тағылымдық ғұмыр жолдары біздің басылым арқылы болашақ жас ұрпақтың үлгі-өнеге алар тәрбиелік мәніне ерекше зор үлес қосары сөзсіз.

Ширек ғасырдай уақыт өңір жұртшылығына қызмет етіп келе жатқан тарихи әр кездері өз ісінің майталмандары Р.Мусин, Ж.Оспанов, С.Есімов, М.Қибасов, Ж.Бошалақ, М.Қосымбай, О.Ізбасаров, Н.Қыдыр, Л.Сәдуақасов, Т.Шадықұлов, А.Сүйеров, Т.Медетбек, Ә.Спан, Ө.Оралбаев, М.Іңірбаев, Г.Сейітжанова, Р.Оңғарбай, Б.Үмбетов, Ә.Базарханұлы, Г.Науырша, Е.Нәрембаева сынды т.б. небір-небір сөз зергерлері газетіміздің ажарлы келбетін жарқырата түсті.

Бүгінде «Маңғыстау» газеті сұранысқа ие басылымның бірегейі. Әр шығатын жаңа санында қызықты да өзекті мақалаларымыз жарық көріп келеді. Күні-түні оқырман қауымға жаңалықтар жеткізуде осы басылымның бас редакторы Ғ.Әріп бастаған ұжымның еңбегі ұшан-теңіз. Осы орайда бас газетіміз үшін ерекшелігі – бұл жолы 10 000-санын жарыққа шығарып отыр. Бұл біздің редакция жұмысының жанданып, ілгері дамып келе жатқанының бір айшықты көрінісі деп білеміз.

Әлемге әйгілі ойшыл Ч.Лэм «Газет үнемі қызығушылығыңды оятады» дегендей, өлкеміздің бас басылымының әр шығатын нөмірін тағатсыздана күтіп отыратын сүйікті оқырмандарымызға зор алғысымызды жеткізгіміз келеді. Сүйікті газетіміздің болашағы баянды болғай!

Құрметпен, Айсұлу ДУТБАЕВА,
«Маңғыстау-Медиа» ЖШС директоры