Еліміздің ұлттық нышандары – мемлекеттік рәміздер. Бұл – кез келген мемлекеттің егемендігі мен біртұтастығын бейнелейтін, оның ажырамас атрибуттарының бірі. Ұлттық нышандар – Қазақстан Республикасының дербестігі мен тәуелсіздігін бүкіл әлемге әйгілейтін әрі мемлекетіміздің өткені мен бүгіні және болашағы арасындағы сабақтастықтың жарқын көрінісі.
Отанды сүю, оны қастерлеу әрі қадір тұту – ұлттық нышандарды ұлықтаудан бастау алады. Біз мемлекеттік рәміздердің мерей-мәртебесін өсіру арқылы өскелең ұрпақ өн бойына отансүйгіштік қасиетті сіңіре аламыз. Болашағы баянды елдің кез келген азаматы өз ұлтының тарихын терең түйсінеді, бүгінін байыппен бажайлайды, ал келешегіне кемел көзқараспен бойлайды. Сол себепті ұлттық тәрбие негіздеріне сүйеніп, жас буынды жаңа заман үдерісіне сай ілкімді білім кеніне жетелеу, ар-иман, әдеп-ибаға баулу, бойына ізгі қасиеттерді сіңіру, туған ел мен жерге деген зор құрмет қалыптастыру – өте өзекті. Сонда ғана ел ертеңіне сенімі зор, Отанының өсіп-өркендеуіне, үздіксіз ілгерілеуіне қызмет қылуға аянбайтын саналы азаматтар саны толығады.
ҚР Мемлекеттік рәміздер күні біздің облыс аумағында кеңінен аталып өтеді. Мәселен, облыс бойынша «Ұлт тірегі – рәміздер» тақырыбында мерекелік іс-шаралар ұйымдастырылып, «Ел рәміздері – еркіндік нышаны» кітап көрмесі өткізілмек. Сонымен қоса ҚР Тәуелсіздігінің 30 жылдық мерейтойы мен Мемлекеттік рәміздер күніне орай арқан тарту, асық ату, ләңгі тебу мен қол күресі секілді ұлттық ойын түрлерінен қалалық ашық біріншілік өткізу жоспарланған. Сондай-ақ мемлекеттік рәміздер мәртебесін ұлттық бірліктің ұлы нышаны ретінде биік тұғырға көтеру мақсатында орта, жоғары және арнаулы білім беру ұйымдарында да әр алуан ісшаралар ұйымдастырылады. Мәселен, колледждер кітапханаларында «Туымен тұғырлы, Елтаңбасымен еңселі, Әнұранымен айбатты Қазақстан» көрмесін жасақтау көзделген. Ал мектептерде «Құрметке лайық рәмізім», «Рәміздер – ұлт мақтанышы» тақырыбында сынып сағаттар өкізіледі. Сондай-ақ балалар арасында «Қазақстан Ертеңі менің көзіммен», «Бірлік пен бейбітшілік рәміздері» атты суреттер байқауын ұйымдастырылмақ. Әрине, бұдан бөлек жоспарға сәйкес астары мен мазмұны ортақ мерекелік іс-шаралар легін өткізу көзделіп отыр.
Елтаңба мен көк Туға, Ән ұранға құрмет – тарихқа тағзым. Өйткені мемлекеттік белгілеріміз – елдің құты, ырысқа сиеті. Қазақстан халқының достығының, бірлігінің және тыныштық пен бейбіт өмірінің символы саналатын мемлекеттік рәміздерімізді қастерлейік.
Ақай МУСАЛИЕВ,
Маңғыстау облыстық ішкі саясат басқармасының бөлім басшысы
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
