Маңғыстаулық экологтар сыбайлас жемқорлыққа қарсы

Пара беру мен парақорлыққа делдал болу, кәсіпкерлік қызметке заңсыз араласуға қатысты жауапкершілік күшейтілді. Осы ретте ҚР Сыбайлас жемқорлыққа қарсы іс-қимыл агенттігінің Маңғыстау облысы бойынша департаментінің превенция және парасатталықы басқармасының басшысы Қайрат Бәйгебаев Маңғыстау облыстық экология департаментінің ұжымымен кездесу өткізді. Ол елдегі сыбайлас жемқорлыққа қарсы пәрменді тетіктерді қалыптастыру бойынша жүйелі шаралар қабылданып жатқанын айтты.

Маңғыстау өңірінде сыбайлас жемқорлыққа қарсы қызметінің мәлімдеуінше, соңғы екі жылда пара берудің 32, парақорлықта делдал болудың 1 және әр түрлі құқыққа қайшы бизнес жұмысына араласудың 24 дерегі анықталған. Бүгінгі таңда облыс бойынша инвестицияның жалпы сомасы 1 трлн 401 млрд 310 млн 212 мың теңгеден асатын «Сыбайлас жемқорлыққа қарсы сүйемелдеудің» 21 бизнес-жобасы бар.

Елбасы мен Мемлекет басшысының тапсырмаларын іске асыру үшін жемқорлыққа қарсы іс-қимылды күшейту жөнінде кезең-кезеңмен бірқатар маңызды заңнамалық шаралар қабылданды.

Өткен жылдың 1 қыркүйегіндегі Мемлекет басшысының Қазақстан халқына Жолдауында пара берушілер мен делдалдардың жауапкершілігін күшейтуді тапсырғанын және бұл тәсіл халықаралық озық тәжірибеге толық сәйкес келетінін атап өтті. Сондай-ақ, қарамағындағы қызметкерлердің сыбайлас жемқорлығы үшін басшылардың отставкасы және тәртіптік жауапкершілігі институты, нормативтік құқықтық актілер жобаларының сыбайлас жемқорлыққа қарсы сараптамасын қалпына келтіру, Қазақстанның ГРЕКО-ға қосылу процесін аяқтау туралы да айтылды.

«Өткен жылы сыбайлас жемқорлық туралы хабарлағаны үшін азаматтарды көтермелеудің жаңа жүйесі қабылданды. Яғни, мемлекеттік қызметшілер мен олардың отбасы мүшелерінің сыйлықтар алуына толық тыйым салынды, сыбайлас жемқорлық субъектілерінің құрамы кеңейтілді және комплаенс-қызметтер институты енгізілді. Бұдан басқа, Мемлекет басшысы сыбайлас жемқорлыққа қарсы іс-қимылдың тиімділігін одан әрі арттыруға бағытталған бірқатар тұжырымдамалық шаралар көздейтін Заңға қол қойған болатын», - деді Қайрат Бәйгебаев.

Өз кезегінде Маңғыстау облысы экология департаментінің басшысы Руслан Төкенов сыбайлас жемқорлықтың алдын-алу мақсатында ұжымда тұрақты түрде түсіндіру жұмыстары жүргізіліп, барлық мемлекеттік органмен қоян-қолтық жұмыс істеп жүргенін айтты.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.