Маңғыстау облысын дамытудың 2021 – 2025 жылға арналған бағдарламасы қабылданды. Бағдарлама үш негізгі бағыты қамтиды, - деп хабарлайды mangystaumedia.kz сайты.
Әр бағыт өз мақсаттары мен индикаторлардан тұрады. Бірінші бағыт - «Өңір экономикасының өсуі». Яғни экономиканы дамыту мен әртараптандыруға, қолайлы бизнес-ортаны және инвестициялық климатты қалыптастыруға, өнеркәсіптік, инновациялық инфрақұрылымды дамытуға бағытталады.
Сонымен қатар өңдеу өнеркәсібі, көлік, логистика, агроөнеркәсіптік кешені мен туризмді дамыту сияқты экономиканың перспективалы салаларын дамыту есебінен аталған секторлар өсімінің орташа жылдық қарқыны қамтамасыз етіледі.
Бірінші бағытты іске асыру нәтижесінде жалпы өңірлік өнім көлемі 2019 жылғы 3,6 трлн.теңгеден 2025 жылға қарай 4 трлн.теңгеге дейін немесе 1,1 есеге артады. Нақты көлем индексінің 103,6%-ға дейін өсуі күтілуде.
Екінші бағыт - «Жайлы және қауіпсіз өңір». Аталған бағыт арқылы тұрғын үй салу қарқынын күшейту, инженерлік инфрақұрылымды жаңғырту, жеке тұрғын үй құрылысын дамытуға мән беріледі.
Маңғыстау облысы әкімдігі баспасөз қызметінің айтуынша, тұрғын үй мәселесін шешу мақсатында жалға берілетін, кредиттік және коммерциялық тұрғын үй салу, «Нұрлы жер» мемлекеттік бағдарламасының аясында 5 жылда 3,5 млн.шаршы метрге жуық тұрғын үйді пайдалануға беру жоспарланып отыр. Нәтижесінде бір тұрғынға шаққандағы тұрғын үймен қамтамасыз ету 2025 жылға қарай 25,5 шаршы метрден 27,2 шаршы метрге дейін жетеді.
Сондай-ақ қалалар мен ауылдардағы халықтың сумен жабдықтау қызметі 2025 жылға қарай 100%-ға жеткізіледі. Бұдан басқа 11 ауылда 750 км канализация желілерін салу есебінен 2025 жылға қарай ауыл халқын сарқынды сумен тазартумен қамтуды 4,5%-дан 48%-ға дейін қамтамасыз ету жоспарлануда.
Келесі «Өмір сүрудың жаңа сапасын қамтамасыз ету» бағыты өңірдің әлеуметтік-экономикалық дамуын қамтамасыз ететін, жұмыспен қамту, халықтың денсаулығын, білімді және әлеуметтік игіліктерге қолжетімділікті жақсарту мәселелерін қозғайтын ең маңызды фактор. Инвестициялық жобаларды, мемлекеттік және өңірлік бағдарламаларды іске асыру есебінен орташа алғанда жылына 32 мыңнан астам жаңа жұмыс орнын құрып, жұмыспен қамтуды арттыру шаралары қабылданады.
«Халықтың денсаулық көрсеткіштерін жақсарту мақсатында ауылдарда кемінде 7 дәрігерлік амбулатория ашу, 6 денсаулық сақтау объектісіне күрделі жөндеу жүргізу, Ақтау қаласында 400 төсек-орындық көпбейінді қалалық аурухана салу, жастардың денсаулық орталықтарын ашу жоспарланып отыр.
Тұрғындарды сапалы біліммен қамтамасыз ету үшін үш ауысыммен оқытуды жою, 2021-2025 жылдары 15120 орындық 17 білім беру объектісін салу жоспарлануда. 5 жыл ішінде 9 мың орындық 100-ден аса мектепке дейінгі балалар ұйымын салу арқылы балаларды мектепке дейінгі тәрбиемен және оқытумен қамту жұмысы жалғасады», - дейді Маңғыстау облысы әкімдігінің баспасөз қызметі.
Ауылдық елді мекендердің әлеуметтік игіліктермен және көрсетілетін қызметтермен қамтамасыз етілу деңгейі 62,6%-дан 2025 жылы 98,4%-ға дейін артады.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
