Халыққа экологиялық білім беру жұмыстары талқыланды

Маңғыстау облыстық қоғамдық кеңесінің кезекті отырысында «Халыққа экологиялық білім беру мен ағарту жұмыстары» тақырыбы сөз болды, - деп хабарлайды mangystaumedia.kz сайты.

Елдің экологиялық кодексіне өзгерістер енгізу, білім және ғылым министрлігінде оқушыларға экологиялық білім беру концепциясы мен бағдарламалар, әдістемелік құралдар жасала бастағаны белгілі. Мектептерде экологиялық сынып сағаттарын өткізудің әдістемелік нұсқаулығы білім мекемелеріне толық жетті. Бұл жөнінде облыстық білім басқармасы басшысының орынбасары Нұрлыбек Қойжанов кеңес отырысында баяндады.

Осы ретте оқушылардың экологиялық білімін арттыру мақсатында «Табиғатпен үндес мектеп», «Табиғатпен үндес балабақша», «Арнаулы орта оқу орындары студенттері арасындағы пилоттық экологиялық жобалау» сынды облыстық конкурстарды өткізіп келе жатыр. Сонымен қатар «Қоршаған орта экологиясы» атты электрондық оқу-әдістемелік құралы шықты. «Табиғатты аяла» экологтар, табиғат зерттеушілер мен жас өлкетанушылардың облыстық және республикалық форумдары, «Туған жер бағдарламасы аясында «Туған өлкем қандай қандай көркем»» деректі фильмдер байқауы, «Экодизайн» облыстық байқауы, «Мектеп үйірмесі – 2020» экология, туризм және өлкетану бағыттарындағы үйірме жетекшілері арасындағы облыстық конкурсы, «Біз тазалықты қолдаймыз» жас волотерлердің облыстық акциясы, «Мектеп жылыжайларында тәжірибелік жұмыстарын жүргізу жолдары» әдістемелік– кеңес, «Экологиялық проблемалардың жасөспірімдердің дамуына әсері» облыстық семинарларды өткізіп келеді.

Білім беру ұйымдарында экологиялық, туристік және өлкетану жұмыстарын дамыту туралы екі рет, 2018 жылы одан соң 2020 жылы тамыз айларында бірлескен бұйрықтар дайындалған. Білім беру ұйымдарында экологиялық, туристік және өлкетану жұмыстарын дамытудың 2018-2023 жылдарға арналған іс-шаралар жоспары бекітілген.

Экология, туризм, өлкетану салаларын дамыту барысында қоршаған ортаның таза сақталуы мен жақсаруына баса назар аудару, аталған жұмыстар саласын жетілдіру мақсатында облыстық, аудандық, қалалық тақырыптық семинар-кеңестер мен өзара тәжірибе алмасу жұмыстарын жүйелі түрде ұйымдастырып отыр.

Экологиялық білім беруге деген қажеттілік адамның өміріне қолайлы ортаны қамтамасыз етумен байланысты. Маңғыстау облыстық табиғи ресурстар және табиғат пайдалануды реттеу басқармасының басшысы Дүйсен Құсбековтың пікірінше, қоршаған ортаның санасы адамның негізгі құқығының бірі – денсаулықты және дамудың негізгі мақсатын анықтайды. Бұл ретте «Табиғатпен үндес мектеп» және «Табиғатпен үндес балабақша» сияқты дәстүрлі байқауының берері мол. Осындай шаралар арқылы өскелең ұрпақты отансүйгіштікке, қоршаған ортаны қорғауды үйретуге болады және бұл ретте білім беру ұйымдарының рөлі орасан.

Маңғыстау облыстық балалар мен жасөспірімдер туризмінің орталығы директорының міндетін атқарушы Аяжан Темірланова, қоғамдық кеңес отырысында табиғатқа сезімталдықпен қарау және экологиялық санасы жоғары азаматтар өсіруде оқу орындарының рөлі маңызды екендігіне тоқталды. Яғни, қауіп төндіретін проблемалардың басым бөлігі адамнан туындайтыны жасырын емес, сол себепті алдымен сананы қалыптастыру ауадай қажет.

Маңғыстау облысының Қоғамдық кеңесінің төрағасы Құралбек Келжанов бүгінгі отырыста адамзат баласының биосфераға тигізетін үстемдігі байқала бастағанын тілге тиек етті. Себебі биосфера компоненттері жер, су, өсімдіктер әлемі, жануарлар дүниесінің азайып кетуіне ықпал етуі ғажап емес. Биосфераның экологиялық-биологиялық тепе-теңдігінің бұзылуына жол бермеу керек. Жер шары бойынша осындай экологиялық өзгерістер болып жатқанын ескерсек, қоршаған ортаға деген көзқарасты бүгіннен бастап, білім беру саласына көңіл бөлуіміз керек.

Қоғамдық кеңес отырысында сөз алған эко-амбассадор Әділбек Қозыбақов, халықаралық табиғатты қорғау одағы IUCN Save Our Species бағдарламасының қаржыландыруымен «Қазақстанның Маңғыстау облысындағы аумақтық мектеп оқушылары арасында қарақұйрықты сақтауды насихаттау» жобасы туралы айтты.

Кеңес отырысына қатысқан «Yessenov Univercity» ректоры Берік Ахметов, тұрақты даму принципін енгізу маңыздылығына тоқталды. Мәселен 2030 жылға дейін концепция бар және оның 17 бағыты айқындалған. Алайда ұлттық деңгейде тұрақты даму концепциясы әлі күнге дейін толыққанды қалыптасып үлгермеген. Кейбір институттар қысқа мерзімді жобаларды жүзеге асыруымен әлек. Атап айтқанда, Әл-Фараби университеті және Сәтпаев тұрақты даму бакалавры бағдарламасын жасақтаған. Бірақ олар тек экологиялық контекстке көп көңіл бөлген және толыққанды методикалық тұрғысынан зерделенбеген.

«Ұлттық деңгейде дайын болуды күтпей-ақ Маңғыстау өңірі деңгейінде өзіндік концепция қабылдау қажет және оған «Тұрақты дамыған Маңғыстау» деген атау жарасар еді. Оның аясында 2030 жылға дейін кедейлік деңгейі белгілі бір пайызға жетеді. Су тапшылығы, білім беру жүйесі осынша пайызға жетеді деп алдын-ала болжам жасалмақ. Яғни, Біріккен Ұллтар Ұйымының 17 индикаторы негізінде өңірлік деңгейде жылда бағалап отыру арқылы, түйіні тарқамаған мәселелерді шешуге болады. Білім беру, жоғары оқу орындары, денсаулық, экология және басқа да салалар индикаторын көре отырып, ұлттық немесе өңірлік деңгейде методика және стандарт қалыптастыру маңызды», - деп түйіндеді Берік Ахметов.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.