Ақтаулық мұғалім 77 жыл іздеген атасының қабірін тапты

Ақтаудағы Назарбаев Зияткерлік мектебінің математика пәні мұғалімі Светлана Озған майдангер атасы Озған Қосановтың жерленген жерін тапты. Күтпеген деректі ұжымдастарының арқасында ресейлік «Память народа» сайтынан анықтаған.

Светлана Озғанның айтуынша, соғыс ардагерін іздеуге себеп болған ұжымдастардың сайтқа сілтеме жіберуі.

«Бұл сайттың барын бұрыннан да білетінбіз. Осыған дейін бірнеше рет қарадық, бірақ атам туралы ақпарат таппаған едік. Өткен аптада әріптестерім сайтқа сілтеме жіберген соң тағы бір рет іздеп көрейін деп шештім. Осыған дейін Озған Қосанов деп іздеп келген едік. Ал осы жолы орыс тілінде аты-жөні басқаша жазылған болар деп әртүрлі іздеу түрлерін жасадым. Нәтижесінде сайттан «Осган Хасанов» деп шықты. Сайттағы мәліметтерге сүйенсек, ол қазіргі Тверь облысындағы «Бобачевский бор» бауырластар қабірінде жерленіпті», - дейді ұстаз қуанышын жасыра алмай.

Отыз жылдан аса тәжірибесі бар мұғалімнің атасы Озған Қосанов 1906 жылы туған. Ұлы Отан соғысы басталған сәтте сол кездегі Гурьев облысы Маңғыстау ауданы Онды елді мекенінен соғысқа кеткен. Ал жұбайы Мақпал Қосанованы екі ұлы және әкесі Қосанмен бірге ауылда қалдырыпты. Озған Қосанов 1942 жылдың желтоқсанында қатты жарақаттар алып, 1943 жылдың 21 қаңтарында қайтыс болған. Ауылға қаралы қағаз келгенмен майдангер Калинин қаласының түбінде жерленді деген дерек қана белгілі болған.

«Атамыздың жатқан жерін іздестіріп, осы күнге дейін таба алмай келгенбіз. Әкем Тұраш Озғанов әкесінің басына топырақ салуды армандап кеткен. Сөйтсек, аты-жөні қате жазылған екен. 77 жыл өткенде және Ұлы жеңіске 75 жыл қарсаңында «Память народа» сайтынан кездейсоқ тауып алдық. Атамыздың аты қате жазылған екен. Топырағы торқа болып, жаны жаннатта болсын», - деді Светлана Тұрашқызы.

Айта кетейік, 2007 жылы РФ Қорғаныс министрлігі «1941-1945 жж. Ұлы Отан соғысындағы Қызыл әскер мен Әскери-Теңіз флотының архив құжаттарын жариялау» туралы бұйрық шығарды. Ұстаздың атасы туралы дерек осы құжатта болған. Сонымен қатар сайтта жауынгерлер туралы деректерден бөлек, бауырластар қабірі туралы деректер, жерленгендердің аты-жөні көрсетілген тақтатастардың фотосына дейін көрсетілген.

Енді педагог осы жазда атасының басына барып, әкесі армандап кеткен бір уыс топырақты салуды жоспарлап отыр.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.