Еліміз бойынша мәслихаттардағы 3415 орынға он мыңнан астам үміткер ұсынылды

© Zakon.kz

Орталық сайлау комиссиясында мажоритарлық жүйе бойынша сайланатын барлық деңгейдегі мәслихаттар депутаттығына үміткерлерді тіркеу қорытындылары ұсынылды, деп хабарлайды mangystaumedia.kz zakon.kz сайтына сілтеме жасап.

ОСК төрағасының орынбасары Константин Петров айтуынша, Қазақстанда 223 мәслихатта 3415 мандат бар. Оның 3081-ін бір мандатты аумақтық округтер бойынша (мажоритарлық жүйе бойынша) сайланған депутаттар алмақ. Бұл - облыстық, республикалық маңызы бар қалалар мен Астана мәслихаттары құрамының 50%-ы, сондай-ақ қалалар мен аудандар мәслихаттары депутаттарының 100% -ын құрайды.

"Аумақтық сайлау комиссияларының деректері бойынша 3081 депутаттық орынға 10 288 кандидат ұсынылды. Орташа бәсекелестік – бір орынға үш кандидаттан артық болып отыр. Облыстық деңгейдегі бір мандатты сайлау округтері бойынша 1451 үміткер ұсынылған. Қала деңгейінде – 2114 және аудандар бойынша – 6732 кандидат тіркелді", - деді ОСК төрағасының орынбасары Константин Петров

Жалпы дерек бойынша үміткерлердің 61,8 пайызы өзін-өзі ұсынған, 38,2 пайызы саяси партиялар мен өзге де қоғамдық бірлестіктер атынан сайлауға түскелі отыр. Тіркелген үміткерлердің 72,84 пайызы ер адамдар болса, қалған 27,16 пайызын әйелдер құрайды. Олардың орташа жасы 42 құрайды.

Сайлаудағы ең жас үміткер 2003 жылы туған. Ол Павлодар облысында тіркелді. Ал ең қарты 1945 жылы туған ең жас кандидат Астана қаласында ұсынылған. Сайлауға қатысуға еліміз бойынша 39 ұлттың өкілдері ұсынылды.

Мәжіліс пен барлық деңгейдегі мәслихаттар депутаттарын сайлау биылғы жылдың 19 наурызына белгіленген.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.