Маңғыстау облысының Астана қаласындағы «Маңғыстаудан мың сәлем, Алаш төрі» атты мәдени күндері басталды. Астана халқы үшін аңыз өріп, жұмбақ жайлаған қасиетті мекеннің мәдени жауһарларымен, бірегей өнер туындыларымен етене танысудың және рухани кездесулерге қатысудың сәті түсіп отыр, - деп хабарлайды mangystaumedia.kz сайты.
Үш күнге жалғасатын мәдени-рухани шаралар аясында астаналық тұрғындарға арнап театр қойылымдары сахналанып, маңғаз Маңғыстаудың мақамды жыр-дастаны, өңір өнімдерінің көрме-жәрмеңкесі, сондай-ақ әдеби-сазды кештер мен салтанатты жиындар ұйымдастырылады.
Алғашқы күні Маңғыстау облысының қуыршақ театры балаларға арнап, “Айжан әженің әңгімелері” трилогиясының “Дастарқан” бөлімін ұсынды. Келген көрермендер қуыршақ театрының әртістеріне ыстық ықыласын жеткізіп, қошеметін білдірді.
- Трилогия Қазақстан қуыршақ театрлары тарихында алғаш қойылған спектакль. Мұнда ұлттық құндылықтар мен салт-дәстүріміз насихатталады. Маңғыстаулықтардың өнерін жас көрермен ықыласпен қабылдады. 40 минутқа созылған қойлымды көрген әр оқушы өзіне тың ақпарат ала алды, - деді МО қуыршақ театрының директоры Фарида Атакеева.
Әрі қарай шара «Мақамы мәшһүр Маңғыстау» атты күй кешімен жалғасады. Концертте Әзірбай Өскінбаев бастаған Маңғыстау облысының танымал өнерпаздары өнер көрсетеді. Сондай-ақ кеш барысында Қазақ ұлттық өнер университетінің ұстазы Жұмабек Қадырқұловтың «Маңғыстаудың 100 күйі» хрестоматиясы, Сұлтанбек Құдайберген мен Ақылбек Тасқараұлының «Маңғыстаудың дәстүрлі жыршылық орындаушылық үлгісін оқыту әдістемесі» оқу-әдістемелік құралының тұсауы кесіледі.
Кешке қарай елорда тұрғындары Н. Жантөрин атындағы Маңғыстау облыстық музыкалық-драма театры сахналаған «Құбылу» спектаклін тамашалайды. Франц Кафканың «Құбылу» әңгімесінің желісімен қойылған белгілі драматург Ермек Аманшаевтың бұл спектаклі трансформацияға ұшыраған адамның өмірі жайында болады.
Айта кетейік, Маңғыстау облысының Елорда төріндегі мәдени күндері 10 қарашаға дейін жалғасады.
Жұлдызай Қалиева
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
