Ақтауда саммит құжаттарын әзірлеу бойынша қорытынды отырыс өтті

Бүгін 2018 жылғы 10 тамызда Ақтау қаласында Каспий жағалауы мемлекеттері Сыртқы істер министрлерінің орынбасарлары деңгейінде Каспий теңізінің құқықтық мәртебесі туралы конвенцияны әзірлеу бойынша Арнайы жұмыс тобының (АЖТ) қорытынды 52-ші отырысы өтті. Бұл туралы ҚР Сыртқы істер министрлігі өзінің ресми сайтында хабарлады.

Келіссөздерге Әзербайжан Респубикасы (жетекшісі – Х.А.Халафов), Иран Ислам Республикасы (жетекшісі – Р. Назар Ахари), Қазақстан Республикасы (жетекшісі – З.A.Аманжолова), Ресей Федерациясы (жетекшісі – И.Б.Братчиков) және Түрікменстанның (жетекшісі – М.Г.Атаджанов) делегациялары қатысты.

"АЖТ отырысында тараптар Бесінші Каспий саммитінің құжаттарын әзірлеу бойынша жұмыстың қорытындысын шығарды, сондай-ақ Каспий жағалауы мемлекеттерінің сыртқы істер министрлері кеңесінің күн тәртібін талқылады және келістірді", - деп хабарлады ҚР СІМ.

Каспий теңізінің құқықтық мәртебесі туралы конвенцияны әзірлеу бойынша келіссөздердің аяқталуына орай, тараптар бірлескен ұзақ мерзімді жұмыс нәтижелерін зор қанағатпен атап өтті.

Делегациялар орын алған келіссөздердің нәтижелеріне оң баға беріп, қорытынды кездесуді жоғары деңгейде ұйымдастырғаны үшін Қазақстан Республикасына өз ризашылығын білдірді.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.