Қордайдағы қақтығыс: Себепсіз салдар болмайды...

Ал себеп пен салдар жергілікті жердегі нақты ахуалға әуелден терең талдау жасап,болуы мүмкін қауіп-қатердің алдын алмаудың кесірінен туындайды. Бүтіндей бір ауылдың билігін беріп қойып тізгіннен айрылу да, үй ішінен үй тігіліп, ақыр соңында көлденең таяққа жығылу да елдік намысқа тиетін нәрсе. Солтүстіктің бәрін қазақтандырамыз деп жатқанда, оңтүстігіміздің өзі ойсырап жатса не болғаны?!

Тегінде қазақ халқы ешкімді ешқашан өгейсітіп өзегінен тепкен де емес, байырғы қазақ жерінде бірде-бір ұлт кемдік көріп, азап шеккен де емес. Қазақ өзін өзгеге ешқашан басындырмайтын да текті ел. Ал әлгіндей «бір құмалақ бір қарынды шірітетін» жағымсыз жәйттер бұл өңірде қоғамдық тәртіптің ақсап тұрғанын, ауа жайылушылық пен жүгенсіздіктің белең алғанын аңғартады. Қай жерде де осынау кемшіліктерге жол берілсе, қарапайым адамдар мен халықтардың араздығына әулекі даңғойлар түрткі болады. Сөйтіп, демократиялық қоғамның басты талабы –заңды, адам құқын және өкімет органдары өкілдерін сыйлау екендігін де естен шығарады. Апырай, сәл нәрседен, жоқ жерден от тұтатып, тып-тыныш, ұядай елдің ішінде алауыздық туғызып, тыныштықты, береке-бірлікті бұзып, ауылдасқа, бауырласқа оқ ату деген қандай күнә десеңізші.

Байқауымызша, Масанчиде заң өкіліне қарсы шығу, мұсылман баласына жат үлкен кісіге тиісу, өзінің бейбастақ ісіне бүкіл әулетті араластырып, жаппай тәртіпсіздікке жол беру секілді басбұзарлық та, сөйтіп ұлтаралық өшпенділікке тамызық құю, оның үстіне барлық ұлтты бауырына басып отырған жергілікті халыққа қарсы пиғыл харекеті де байқалады.

Ендеше, оқиғаны бастаған және қостаған бүлікшілерге заң үкімі қатал болсын. Көптеген адам өліміне соқтырған қайғылы жағдайда қылмыскерлерге кешірім болмауы тиіс. Ал келешекте екіжақтың ақсақалдары ақылдасып, мақұлдасып, мамыражай бейбіт күндегі мұндай бассыздық пен берекесіздікке бой бермеуге уағдаласса, ортақ пәтуаға келсе, құба-құп.

Ғалым Әріп

ҚР мәдениет қайраткері