Тәуелсіздік күніне орай бір топ маңғыстаулық мемлекеттік марапатқа ие болды

Ақтауда Тәуелсіздік күні қарсаңында 13 адам жоғары мемлекеттік наградаға ие болды. Марапаттарды мерекелік жиында салтанатты түрде Маңғыстау облысының әкімі Ералы Тоғжанов тапсырды.

«Парасат» орденімен өлкетанушы-зерттеуші А.Еділхан мен «Каскор-Транссервис» акционерлік қоғамы Басқарма төрағасы Ә.Сахимов марапатталды.

«Құрмет» ордені Сайын Шапағатов атындағы ауыл дәрігері С.Керелбаевқа, «Теңіз Сервис» жауапкершілігі шектеулі меріктестігі бас директоры Ғ.Құсайынға, Абыл Тарақұлы атындағы қазақ ұлт аспаптар оркестірі дирижері Р.Мәдреевке, Мағыстау облыстық мәслихат кеңесшісі Д.Сейбағытовқа, Маңғыстау облыстық ардагерлер кеңесі төрағасы С.Төлетовке, еңбек ардагері Б.Тұрарбековке табысталды.

Сондай-ақ үшінші дәрежелі «Еңбек даңқы» орденімен марапатталғандардың қатарында машинист, дәнекерлеуші, оқшаулаушы сияқты қарапайым еңбек адамдары бар.

Маңғыстау облысы әкімі баспасөз қызметінің хабарлауынша, 41 адамға «Ерен еңбегі үшін» және «Шапағат» медалі мен Құрмет грамоталары беріліп, 9 адам "Маңғыстау облысының құрметті азаматы" атағын алды. Олардың қатарында Олимпиаданың екі дүркін күміс жүлдегері, боксшы Әділбек Ниязыметов те бар.

"Татулық пен келісім, қоғамдық бірлік пен татулықтың арқасында Қазақстан әлемдік қауымдастықта өз орнын мығым етті. Маңғыстауда өткен Бесінші Каспий маңы мемлекеттері Саммиті - соның дәлелі. Жиырма жылға созылған келіссөздер нүктесі Ақтауда қойылғаны, «Каспий теңізі статусы жайлы Ковенцияның» қабылдануы – тарихи маңызы бар сәт», - деген Ералы Тоғжанов аймақтың әлеуметтік-экономикалық көрсеткіштері жайлы баяндап, тәуелсіздік жылдарындағы Маңғыстаудың жетістіктеріне тоқталды.

Айта кетелік, биыл Маңғыстауда 6300 орындық 9 мектеп салынып, облыстық Ана мен бала орталығы ашылды. Биыл қазан айында онкологиялық орталық құрылысы қайта жанданды. «Нұр капитал» аймақтық бағдарламасы бойынша жалпы сомасы 3,4 млрд.теңге болатын 200-ге жуық бизнес-жобалар екінші деңгейлі банктерде қарастырылып жатыр. Сонымен қатар кіші және орта бизнес субъектілері саны 46 мыңнан 51 мыңға дейін артып отыр.

Тәуелсіздік күніне арналған салтанатты жиын мерекелік концертке ұласты.

Суреттерді түсірген Серік МАЙЕМЕРОВ

[gallery td_select_gallery_slide="slide" ids="67665,67664,67666"]