Маңғыстау өнерпаздары Дубайда жүлдеге ие болды

Біріккен Араб Әмірліктерінде жасөспірімдер арасында барлық өнер түрі бойынша «Jumeirah Sound» ІІ халықаралық фестиваль байқауы өтті.

Дубай қаласында өткен байқауға ТМД елдерінен дарынды балалар жиналды.

Шараның мақсаты – өнерпаздардың жеке тұлғаның шығармашылық дамуы, талантты орындаушыларды анықтау және қолдау.

Фестиваль «Chamber Academy of music» Академиясының қолдауымен өткізілген. Айта кету керек, академия Астана қаласындағы Қазақ Ұлттық өнер академиясының серіктестігі.

2 қараша күні Түпқараған ауданынан (Форт-Шевченко, Ақшұқыр, Сайын ауылдарынан) сайысқа қатысушылар Әмірліктерге аттанған. Олардың қатарында 8 өнерпаз, 3 жетекші бар. Маңғыстаулық қатысушылар байқаудағы барлық жүлде түрін қанжығалады.

«Сазсырнай» аталымы бойынша Форт-Шевченко қаласы Мұрын Сеңгірбекұлы атындағы өнер мектебінің оқушысы Озғанбаева Қарлығаш Болатбекқызы 1 орын алды. Жетекшісі – Әсел Нұрсұлтанова.

«Бейнелеу өнері» аталымы бойынша «Серпін» аула клубы үйірмесінен Тілекбаева Жайна 1 орын, Жетекшісі – Закира Базарбекова.

Домбырадан ұжымдық аспаптық орындау бойынша «Ақжелкен» ансамблі Гран-При иеленді. Жетекшілері: Сисенбаева Алмагүл, Есмұханбетова Күләш.

Домбырадан жеке орындау бойынша жас маман Сүндетқалиев Жасұлан Гран-При, Червонов Темірлан 1 орынды жеңіп алды. Жетекшісі – Сисенбаева Алмагүл. Ал Әлқуатова Мәдина, Молдағали Бекайдар, Құлжан Сабина, Қасымқызы Райхан 2 орын еншіледі.

Ел абыройын асқақтатқан өнерпаздарымызды жүлделерімен құттықтаймыз. Айта кетейік, байқауға Петропавл, Қызылорда, Астана қалалырынан да өнерпаздар қатысты. Олар елге 9 қараша күні оралатын болады.

Теңге БЕКМҰРЗАЕВА

Суретті ұсынған Гүлбаршын Избаева

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.