Ақтауда мұнайшылар күні тойланды

Бүгін Ақтаудағы "Маңғыстаумұнайгаз" компаниясы ғимараты алдына қоғам жəне мемлекет қайраткері, қазақ мұнайының атасы Сафи Өтебаевтың ескерткіш бюсті қойылды. Оның ізбасар əріптестері, ардагерлер мен ұрпақтары бас қосып, ескерткішті салтанатты түрде ашты. Жиылған көпшілік қазақ мұнайының атасы туралы естеліктерімен бөлісіп, тұлғаны құрметпен еске алды.

Бұдан соң айтулы мереке салтанатты шараға ұласты.

Жер қойнауының қара алтынын игеріп, ел ырыздығын еселеуге елеулі үлес қосып жүрген мұнайшылар мен мұнай-газ кешені саласы қызметкерлеріне арнап ауқымды шара ұйымдастырылды. Оған мереке иелерімен қатар ардагер мұнайшылар, мемлекеттік қызметкерлер қатысты.

Маңғыстау облысы əкімінің бірінші орынбасары Серік Аманғалиев жиналғандарды қос мерекемен құттықтап, жылы лебізін білдірді.

Мұнай-газ кешені саласының дамуына сүбелі үлес қосып жүрген қызметкерлер облыс əкімінің Құрмет грамотасымен марапатталды.

-"Мұнай саласында еңбек еткеніме қыркүйек айында 40 жыл толады. Яғни, 1978 жылы ұңғыма басындағы қыздыру пештерін жөндеу слесары болып қызметімді бастағанмын. Қазір "ҚазМұнайТеңіз" компаниясының Ақтаудағы филиалында өндірістік басқарма басшысы қызметін атқарып жүрмін. Маңғыстаулықтарды алдымен Конституция күнімен, əріптестерімді мұнайшылар мерекесімен құттықтаймын. Еңбектеріне жеміс тілеймін. Жəне де бүгін мұнай саласына зор үлесін қосып кеткен Сафи ағамызға ескерткіш орнатылды. Бұл өсіп келе жатқан жастарға, келешек ұрпаққа үлкен серпін береді, үлгі болады деп есептеймін", - деп лебізін білдірді Дауылбай Əбілханов.

Мұнай-газ кешені бүгінде ел экономикасының негізі, елімізді əлемге танытар басты сала. Шараға келгендер Сафи Өтебаевқа арналған кітаппен, оның өнегелі өмірімен танысып қайтты. Туынды саналы ғұмырын мұнай саласының дамуына арнаған қазақтан шыққан тұңғыш мұнайшы инженердің өмір мен өндірістегі жолынан сыр шертеді. Сондай-ақ өз қолынан шыққан тундылары, қолжазбалары мен ол туралы естелік шығармалар енгізілген.

Жиын соңы қонақтарға арналған мерекелік концертке ұласты.

Теңге БЕКМҰРЗАЕВА Суретті түсірген Серік МАЙEМЕРОВ

[gallery td_select_gallery_slide="slide" ids="60338,60339,60340,60341,60342"]