Бүлдіршіндердің туған жерге тартуы

Тал шыбықты қалай исең, солай өседі. Баланың санасына не сіңсе, сонымен қалыптаспақ. Бүлдіршіндердің ойнайтын ойыны арқылы да ой-өрісі арта түсетін көрінеді.

Астананың 20 және Ақтау қаласының 55 жылдығына және 5-ші Каспий саммитіне орай балаларға ұлттық ойындарды насихаттау, еліміздің татулық пен бейбітшілік бағытында патриоттық тәрбие беру мақсатында Маңғыстау облысындағы Қазақстан халқы Ассамблеясының қолдауымен Ақтаудағы №24 балалар бақшасында «Мен Маңғыстауыммен мақтанамын!» тақырыбында ұлттық шара өтті. Педагог Рафига Насибова ұйымдастырған бұл шара барысында әр түрлі ұлттар өкілдерінің балалары қазақтын ұлттық ойындарының бірі асық ату ойынын ойнады. Сондай-ақ балалар ұлттық билер биледі, патриоттық әндер айтып, Маңғыстау туралы өлеңдерді мәнерлеп оқыды.

Балаларға арналған осынау шараға арнайы «Қоғамдық келісім» мекемесінен қонақтар қатысты. Олар — «Достлуг» азірбайжан этномәдени бірлестігінен Шахназ Абдуллаева, татар және қазақ ұлтымен аралас Амина Аккушимова, әнші Дени Аккушимов. Көңілді басқосу соңында қызықты шара ұйымдастырып, белсенділік танытқаны үшін №24 балабақшасына «Қоғамдық келісім» КММ атынан Алғыс хат табысталды.

Ал ата-аналар мен балабақша қызметкерлері бүлдіршіндерге мереке сыйлаған азаматтарға ризашылық білдіріп, алғыс айтты.

   Валентина ҚОЗЫБАҚОВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.