Ана сүтінен артығы жоқ

©

Бүгін 1-7 тамыз Дүниежүзілік баланы емізу апталығына орай өңірлік коммуникациялар алаңында брифинг өтті. Онда тұрғындардың уақытында скринигтен өтуі, жүкті әйелдердің 12 аптаға дейін есепке тұруы, 1 жасқа дейінгі балалардың дәрігерлік бақылауда болуы, баланың ана сүтімен тамақтандырудың маңыздылығы сынды тақырыптар сөз болды.

Жүкті әйел тұрғылықты мекен-жайы бойынша тіркелген емханаларға барып, жүктіліктің 9-12 аптасында есепке тұруы қажет. Бұл уақытта тексерілудің ана мен бала денсаулығы үшін маңыздылығын баса айтты мамандар. Баланың аурулары мен патологиялық белгілері болса, анықталып, диагноз қойылуы мүмкін.

Сондай-ақ елімізде емізу апталығына «Емізу – бала саулығының негізі» бағдарламасы орайластырылған.

– Дүниеге келген баланың денсаулығының мықты болуында, өсіп-жетілуінде, айналаны танып білуінде, дүниетанымының қалыптасуында ана сүтінің маңызы өте зор. Құнарлы, нәрлі ананың сүтін дүкен сөрелеріндегі сүттермен алмастыруға болмайды. Сондай-ақ ешкінің, түйенің, сиырдың сүттері де ағзасы толық жетілмеген бала ауыр тиеді. Әрбір әйел дүниеге сәби әкелгеннен кейін өзін күтуі тиіс, - дейді Ақтау қалалық перзентханасының директоры Галия Махимова.

Сонымен қатар ол әйел адамның бала емізуге сүтінің болмауы тамақтанбауына емес, жүйке жүйесінің тыныш болуына байланысты екенін жеткізді.

- Ана сүтінің жеткілікті болуына жан-жақты фактор әсер етеді. Көпшілік толыққанды тамақтанса ғана ана сүті түзіледі деп санайды. Ал негізінде сүттің өнуі – гормонды үдеріс. Жүйке жүйесінің жұмысына тәуелді. Егер ана жақсы тынығып, артық ойлар мазаламаса, жақындары, отбасы жақсы қарым-қатынас жасап, көңілін түсірмесе, сүт жеткілікті дәрежеде болады. Сондықтан жас ананың уақытылы тамақтанып, тынығуына, баласына қарауына мүмкіндік беру керек. Жатыр босанған соң 6-8 аптада қалыпқа келеді. Оған дейін әйелге физикалық және психологиялық күш түспеуі қажет, - дейді Ақтау қалалық перзентханасының директоры Галия Махимова.

Сондықтан емізетін анаға отбасы, жары қолдау көрсетіп, физикалық-моральдық тұрғыдан салмақ салмауы тиіс. Ана сүтімен мейірі қанғанша тамақтанған баланың денсаулығы да мықты, әкесі мен анасына қамқор, жанашыр болып өсетінін алға тартады мамандар. Баланы кемдегенде 6 ай емізіп, келесі жүктілікті араға екі жыл салып жоспарлау керектігін айтады. Бұл мерзімде ана денсаулығы қалыпқа келіп, жүктілік кезеңіне дайын болады дейді.

Теңге БЕКМҰРЗАЕВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.