27 жастағы Ақтау тұрғыны суға батып кетті

Маңғыстауда 27 жастағы қала тұрғыны теңізге батып, мерт болды, - деп хабарлайды Маңғыстау облыстық төтенше жағдайлар департаменті.

Оқиға облыс орталығынан 63 шақырым қашықтықта орналасқан жағажайда болған. Құтқарушылардың пікірінше, марқұм биік жартастан секірген.

«Сағат 17.45-те Түпқараған ауданы, «Голубая бухта» деп аталатын аумақта жігіттердің суға секіріп жатқаны туралы хабарлама келді. Жедел құтқару жасағы Ақтаудан дереу шыққан болатын. Өкінішке орай, құтқарушылар жеткенше, бір жігіт суға батып кетті»,-дейді МО төтенше жағдайлар департаментінің өкілі.

Жігіттің денесін судан жанындағы жолдастары шығарып алған. Олар бұл оқиғаның қас-қағым сәтте болғанын баяндады.

Төтенше жағдайлар саласының өкілдері бұл жердің суға түсуге ең қауіпті аймақ екенін айтады. Ол жерден тек машықтанған адамдар ғана секіре алады.

Айта кетейік, 25 мамыр күні суға шомылу маусымы басталғалы демалушылардың теңізге батып кету жағдайы тіркелмеген еді. Бұл алғашқы қайғылы жағдай.

Құтқарушылар суға түсу кезінде абай болып, қарапайым қауіпсіздік шараларын сақтап, тыйым салынған аумақта суға түспеуге шақырады.

Дереккөз: inform.kz

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.