Келісті жұмыс керек

Облыс әкімдігінде өткен аппарат мәжілісінің күн тәртібінде аймақта мал шаруашы­лығының дамуы, «Астана­-1» кедендік және салықтық әкімшілендірудің автоматтандырылған жүйесі, өнеркәсіптік кәсіпорындардағы кейбір жайттар, Премьер-­Министр кеңсесінің тапсырмаларын және хаттарды мерзімінде орындау мәселелері қаралды. Жиынға облыс әкімі Ералы Тоғжанов, аймақ басшысының орынбасарлары, облыстық басқарма мен мекемелердің, кәсіпорындардың басшылары қатысып, аудан әкімдері онлайн қосылды.

Жиында алдымен ай­мақ басшысы Ералы Тоғжанов «Каспий» әлеуметтік-­кәсіпкерлік корпора­циясы» ұлттық компаниясы» ак­ционерлік қоғамының басқарма төрағасы қызметіне тағайындал­ған Әбиесов Жомарт Амангел­діұлын таныстырды.

Аппарат мәжілісінде облыстық ауыл шаруашылығы басқарма­сының басшысы Серік Қалдығұл мал шаруашылығындағы көрсет­кіштерден хабардар етті.

– Биылғы жылдың басындағы көрсеткіш бойынша ірі қара мал саны 17 800 басқа жетіп, 18%-­ға өсті. Қой саны – 281 600 (2,5%), ешкі  –  91  600  (5,5%),  жылқы  – 69 600 (10,5%),  түйе  –  59 000 (11,5 %), құс 41 200 (42,0%) басқа артты. Аймақтағы барлық мал саны – 520 000 бас. Барлық санаттағы шаруашылықтарда мал мен құстың тірілей салмақта етке өткізілуі 10 382,2 тоннаны құрап, өткен жылмен салыстырғанда 2,4%­-ға өсті, ал сиыр сүтін өндіру 20,2%-­ға артып, 6 293,8 тонна бол­ды. Сонымен қатар 4 971,7 мың дана тауық жұмыртқасы өн­діріліп, 2,8 есе артты. Бүгінде облыста 29 асыл тұқымды мал шаруашылығы тіркелген. Асыл тұқымды қойдың саны – 10500, жылқы – 3100, түйе – 1700, ірі қара мал – 200 бас. Өткен жылы облыста 59 құдық қазылды. Атап айтсақ, Ақтау қаласында – 1, Бей­неуде – 1, Маңғыстау ауданында – 7, Мұнайлыда – 5, Қарақияда – 28, Түпқарағанда - 17 құдық қазылды,– деді аталған басқарма басшысы.

Серік Қалдығұлдың айтуынша, өткен жылы «Маңғыстауагро­сервис» ЖШС арқылы 113 млн. 910 мың теңгенің тауарлы не­сиесі берілді. Атап айтқанда мал шаруашылығы өнімдерін өңдеу қондырғыларына және ауыл ша­руашылығы техникаларына 43 млн. 962 мың теңге, ауыл шаруа­шылығы жануарларына 69 млн. 948 мың теңге бөлінген. 2017 жы­лы 50 мың тонна пішен дайындау жоспарланып, 51,2 мың тонна ірі сояулы шөп жиналған.

Облыс әкімі Ералы Тоғжанов аталған басқарма басшысы мен аудан әкімдеріне құдық қазу, мал басының санын көбейту, асыл тұқымды мал басын арттыру ту­ралы тапсырма берді.

Жиында Маңғыстау облысы  бойынша мемлекеттік кірістер департаментінің басшысы Әлібек Тілегенов «Астана­-1» кедендік және салықтық әкімшілендірудің автоматтандырылған жүйесінің іске асуы туралы ақпарат берді.

– Осы жылдың 1 қаңтарынан бастап елімізде кедендік рет­теу туралы жаңа Кеден кодексі күшіне енді. Жаңа құжат кеден­дік рәсімдерді жеңілдетуге, ке­дергілерді азайтуға бағытталған. Елбасы Н.Назарбаевтың «100 нақты қадам» Ұлт жоспарының 38,39­ қадамдарын іске асыру шеңберінде «Астана­-1» кедендік және салықтық әкімшілендіру­дің автоматтандырылған жүйесі әзірленді.  Біз 1 сәуірден бастап «Астана­1» ақпараттық жүйесін қолданысқа еніздік. Бұл жүйе Дүниежүзілік сауда ұйымының, халықаралық стандарттарына сәй­кес 90­-нан аса мемлекетте белсен­ді қолданылатын «ASYCUDA» бағдарламасы шеңберінде әзір­ленген көп функционалды бағ­дарлама болып табылады. Бағ­дарламаның бірінші кезеңі 2017 жылы 1 қазанда басталды. Бүгінде «Транзит» үдерісінде тауар­ларды  кедендік  рәсімдеу  8 есеге қысқарып, 4­7 минутты құрады, – деді Әлібек Тілегенов.

Оның айтуынша, 1 сәуірден бастап «Астана­-1» жүйесі бойын­ша шығарылған тауарларға ар­налған декларация саны – 1439. Оның ішінде ішкі тұтыну кеден­дік рәсіміне, яғни импортқа – 591, экспорт бойынша – 761, басқа ке­дендік рәсімдерге 87 декларация өткен.

– Біздің департаментте бизнес үрдістерді цифрландыру, кеден­дік рәсімдерді орталықтандыру бойынша ауқымды жұмыс жүр­гізілді. Кедендік рәсімдеу «бір терезе» қағидасымен жасалады. Операциялық  залда  жеке  жә­не заңды тұлғалар барлық қыз­меттерді электронды кезек ар­қылы ала алады. Операциялық бөлімде бақылау үдерістері жү­реді. Сондай­-ақ баж және ке­ден салықтарын төлеу үшін 2 деңгейлі банктердің өкілдері де бізде жұмыс істейді. Мұның барлығы уақытты үнемдеуге мүмкіндік береді. «Астана­-1» жүйесін толыққанды іске қосу арқылы шағын және орта бизнесті дамытуға, индустрияландыру, экономикалық өсімді, тауар ай­налымын арттыруға жұмыстанып жатырмыз.

Ералы Тоғжанов түбекте тауар айналымын көбейту үшін шет мемлекеттерді, түрлі компания­ларды және жергілікті халықты мұндай жаңалықтардан хабардар етуді тапсырып, цифрландыру­ды әрбір салаға енгізгенде орын алатын жұмыссыздық мәселесін шешу үшін мамандарды қайта оқытудың қажеттілігі туындайты­нын қаперге берді.

Аппарат мәжілісінде баяндама жасаған облыстық индустриалды­ инновациялық даму басқармасы басшысының міндетін атқарушы Талғат Әбдіқадыровтың айтуын­ша, «Үдемелі индустриалды­ин­ новациялық даму» бағдарлама­сының екінші бесжылдығында 2015 – 2019 жылдарға арналған облыстың Кәсіпкерлікті қолдау картасына 22 жоба енгізілген. Жобаларға 526,4 млрд. теңге кө­лемінде инвестиция салу, 3349 жаңа жұмыс орнын ашу жоспар­ланған.

– «Куду Индастриз Қазақстан» ЖШС-­ның бұрандалы сорғы шығаратын цехы өткен жылы 820 дана сорғы шығарды. Биыл 1101 сорғы  өндіреді. Бұл цех­та 16 адам  жұмыс істейді. Биыл I жартыжылдықта тапсы­рыс көлемін көбейтіп, цехтың қуаттылығын арттыруды көздеп отырмыз. Нан, кондитерлік және макарон өнімдерін,  тағы  да басқа тағам түрлерін шығаратын «Берекет–Ф» зауытының да бә­секеге қабілеттілігін арттыруға көмектесеміз. «Атамекен» ұлттық кәсіпкерлік палатасы өңірлік филиалымен бірігіп, 100 сауда нүктесін ашып, жергілікті  та­уар өндірушілердің өнімдерін халыққа ұсынамыз, – деді Талғат Сейілханұлы.

Жиын соңында Премьер -Ми­нистр кеңсесінің тапсырмаларын және хаттарды мерзімінде орын­дау мәселесі де қаралды. Облыс әкімі Ералы Тоғжанов бұл мін­деттерді уақытында орындамаған бірқатар аудан әкімдері мен басқарма басшыларына ескерту жасап, қатаң талап қойды.

Фарида МҰҢАЛҚЫЗЫ Суретті түсірген Серік МАЙЕМЕРОВ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.