Бауыржан үш дүркін Азия чемпионы атанды

Маңғыстаулық балуан Бауыржан Сағынғалиұлы Ашхабадта самбодан өткен Азия чемпионатында топ жарып, түбекке алтын медальмен оралды. Сондай-ақ, аталмыш халықаралық жарыстан Айболат Мұратұлы (100 келі салмақта) және Нұркен Домбаев (57 келі салмақта) қола медальдарды иеленіп, жерлестеріне жеңіс сыйлады.

         -Түркіменстанның Ашхабад қаласында өткен Азия чемпионатына 17 мемлекеттен 300 балуан қатысып, бақтарын сынады. Дүбірлі дода самбодан және әскери самбодан өтті. Бұл жолы жарыста облыстың намысын 3 балуанымыз қорғап, үшеуі де үмітімізді ақтады. Жалпы жарысқа елімізден 44 балуан қатысып, оның 42-сі елге жүлделі орындармен оралды,-дейді белгілі бапкер Сергей Волобуев.

Халықаралық жарыста ел намысын абыроймен қорғаған «Жастар» спорт мектебінің балуаны Бауыржан Сағынғалиұлының спортты жанына серік еткеніне биыл-10 жыл. Жүректі балуанымыз бұған дейін жасөспірімдер арасында екі дүркін Азия чемпионы атанған. Одан бөлек, Ригада өткен Әлем чемпионатында қола медальді иеленіп, бапкерлер үмітін ақтаған.

- Әр жарыстан елге жүлделі орынмен оралу үшін барымды салып күресемін. Бұл жолы Азия чемпионатында 62 салмақта күресіп, елге алтын медальмен оралдым. Боз кілемге бірінші түркімендік балуанмен шықтым, есеп 8:2, одан кейін қырғыздық балуанды 10:0 есебімен ұттым. Ақтық сында өзбекстандық балуанның жауырынын жер иіскетіп, Азия чемпионы атандым. Мені жарысқа дайындаған бапкерлеріме алғыс айтамын. Ендігі меже-Әлем чемпионатын, Олимпиада шыңдарын бағындыру,-дейді үш дүркін Азия чемпионы Бауыржан Сағынғалиұлы.

Енді балуандарымыз қазан айында Румынияда өтетін Әлем чемпионатына қатысып, бақтарын сынайтын болады.

Венера МИРЛАН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.