Үстел теннисі турнирі мәресіне жетті

Өлкемізде ел рәміздерінің және Қарулы Күштердің 25 жылдығына орай Маңғыстау облысы әкімінің кубогына үстел теннисінен турнир өтті. Бүгін сайыстың ақтық сынына жолдама алған спортшылар бақ сынасты. Финалдық ойынды тамашалауға Маңғыстау облысының әкімі Ералы Тоғжанов және Ардагерлер мен БАҚ өкілдері қатысты.

-Тәуелсіз елдің болашағы халықтың қолында. Егер ол салауатты ұлт болатын болса, тәуелсіздігі де мықты болады. Бұл кішкентай турнир болғанымен, үлкен істерге жасалып жатқан үлкен қадам ретінде қарауымыз керек. Спортты дамыту, халықтың салауаттылығын арттыру мақсатында өңірімізде бірнеше нысан бой көтерді, салынып та жатыр. Маңғыстау облысының өзінде 25 үлкен алаң пайда болады. Оның 15-ін салдық, келесі жылы 10-ы тұрғызылмақ. Одан өзге Ақтау қаласындағы әрбір шағынауданға бір-бір алаңнан салу жоспарланып отыр. Бір спорт алаңының бір айда 5 мың баланы қамтитын мүмкіндігі болмақ. Сонда 25 спорт нысанында айына қаншама бала жаттыға алатынын есептей беріңіз. Келесі жылы 4 Га жерге үлкен спорт мекемесі тұрғызылмақ. Салауатты өмір сүрген халық қана бәсекеге қабілетті болады. Бүгінгі турнирге де бірнеше азамат қатысты, міне, финалдық ойынды көруге келіп отырмыз. Жалпы бұл сайысқа қатысқан жігіттердің бәрі жеңімпаз деп есептеймін, - деді облыс басшысы Ералы Тоғжанов.

Ардагерлер одағы және Тәжік-Ауған шекарасында жауынгерлік қимылдарына және әскери қақтығыстарға қатысушылардың республикалық қоғамдық бірлестігінің атынан Мұхамеджанов Мұрат Маңғыстау облысының әкімі Ералы Тоғжановты «Отанға қызметі үшін» медалімен марапаттады.

Бұдан соң жиналғандар үстел теннисі турнирінің финалына жолдама алған спортшылардың ойынын тамашалады. Нәтижесінде Жақсылықов Бақытбек 1 орын, Тұрғалиев Махаббат 2 орын иеленді. Ал Бердібаев Ілияс үштікті қорытындылады.

МО Үстел теннисі Федерациясының президенті Сұңғат Аңшыбайұлы облыстағы тұралап қалған спорттардың бірі – үстел теннисіне соңғы 4 жылда көңіл бөлініп, қолға алынғанын жеткізді. Осы аралықта бірнеше жарыстар мен турнирлер өткізген. Федерация басшысы облыс әкімі Ералы Тоғжановқа үстел теннисіне арналған спорттық киім үлгісін тарту етті.

Теңге БЕКМҰРЗАЕВА

Суреттерді түсірген Серік МАЙЕМЕРОВ

[gallery td_select_gallery_slide="slide" ids="39672,39673,39674,39675,39676,39677,39678,39679,39680"]