Ақтау қаласындағы «Жасыл ел» еңбек жасақтарының сарбаздары алғашқы еңбек маусымын аяқтады. Маусым айының 15-нен бастап облыс орталығын аббаттандыру, санитарлық тазарту және көгалдандыру жұмыстарын атқару ісіне жұмылдырылған «Жасыл ел» еңбек жасақтарының құрамындағы 150 жас бір ай бойына аянбай еңбек етті.
Жазғы демалыстарын тиімді өткізіп, пайдалы іспен айналысуға құлшыныс танытқан ынталы колледж студенттері мен жоғары сынып оқушылары «Жасыл ел» құрамында еңбек етіп, бір жағынан өз туған қаласының көркеюіне атсалысса, екінші жағынан жұмыс істеп, табыс табу мүмкіндігіне ие болды. Төрт топқа бөлінген жігерлі жастар шаһардың 1, 30 шағынаудандардағы, ботаникалық бақтағы, қалалық саябақтағы тал-теректерді суарып, ағаштардың түбін қопсытып, арам шөптерден тазартып, санитарлық тазарту жұмыстарын жүргізді.
- «Жасыл ел» еңбек жасағына келгеніме өте қуаныштымын. Себебі мұнда мен алғашқы рет еңбекке араласып, өзімді сынап көрдім. «Еңбек етсең ерінбей, тояды қарның тіленбей» демекші, жұмыс істеп, табыс тауып, ата-анама қаржылай қолдау көрсетумен қатар сүйікті қаламыз Ақтаудың көркейіп, гүлденуіне, ажарлана түсуіне өз үлесімді қостым,- дейді мектеп оқушысы Мадина Байрамбаева.
Маңғыстау облыстық жастар ресурстық орталығының директоры Досан Жеткізгеннің айтуынша «Жасыл ел» еңбек жасақтарының құрамына жастарды қабылдау кезінде әлеуметтік жағынан аз қамтылған отбасылардың балаларын жұмысқа алуға көбірек көңіл бөлінеді. Жұмыстан бөлек жастар облыс орталығында ұйымдастырылған түрлі мәдени, мерекелік шараларға белсене қатысып, қоғам өміріне тікелей араласады. Еңбек ету арқылы өздерінің материалдық жағдайын жақсартуға болатынын ұғынған жастар да, олардың ата-аналары да «Жасыл ел» еңбек жасақтарының бұл бағыттағы жастарға берген мүмкіндігіне риза екендіктерін айтты.
- Мен көгалдандыру жұмысына келгенде отбасымның қаржылық жағдайын жақсартуға өз үлесімді қоссам, сол арқылы ата-анама қолқабыс етсем, әрі қаламыздың тазалығы мен көгалдандыруына да өз пайдамды тигізсем деп келген болатынмын. Біздің отрядтағы 37 жас осы алғашқы маусым ішінде өте жақсы жұмыс істеді. «Еңбектің наны тәтті, жалқаудың жаны тәтті» демекші, өз маңдай терімізбен қаржы тауып, жазғы демалысты пайдалы іс істеумен, тиімді өткізуге тырысудамыз, - дейді 14 жасар Ұлан Көбесінұлы.
Шілденің 17-нен бастап «Жасыл ел» еңбек жасақтарында жазғы еңбектің екінші маусымы басталды.
Венера МИРЛАН
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
