Мұхамбет қола медальға қол жеткізді

Оңтүстік Қазақстан облысының Ленгер қаласында дзюдо күресінен «Қапал батыр» атындағы халықаралық турнир өтті. Осымен он сегізінші рет ұйымдастырылған дәстүрлі турнирге 2000-2001 жылы туылған, еліміздің барлық облысы мен Қырғызстан, Өзбекстан, Ресей, Тәжікстан, Қарақалпақстан, Түркия мемлекеттерінен келген 450 балуан қатысты.       

Екі күнге жалғасқан жарыстың қорытындысында маңғыстаулық балуан, облыстық «Жас Батыр» мамандандырылған балалар мен жасөспірімдер спорт мектебінің шәкірті Мұхамбет Зұлқарнаев топ жарып, қола медальді қанжығалады.

- Ленгерде өткен халықаралық турнирде +81 келі салмақта белдескен шәкіртіме бұл жолы қола медаль бұйырды. Боз кілемдегі алғашқы кездесулерін жаңаөзендік, өзбекстандық балуандармен өткізген Мұхамбет айқын басымдылықпен жеңіске жетті. Келесі кезеңде атыраулық балуанға есесін жіберіп, қола медаль үшін ленгерлік балуанмен кездесті. Қарсыласын 8 секундта «иппон» әдісімен жеңіп, үшінші орынға тұрақтады. Бұған дейін Мұхамбет-қазақ күресінен ҚР-ның күміс, қола жүлдегері, «Жас барыстан» күміс жүлдегер атанды. Түркістан қаласында самбодан кіші жасөспірімдер арасында өткен Қазақстан Республикасының чемпионатында алтыннан алқа тақты,-дейді облыстың дзюдо күресінен аға бапкері Жомарт Қобыланов.

Дзюдодан ұйымдастырылған халықаралық турнир 28-30 маусым аралығында Ленгер қаласында өтті.

Венера МИРЛАН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.