Тәуелсіз елдің жадыраған жастары! (ФОТО)

©

17 қараша күні – халықаралық студенттер күні. Осы мереке аясында Ш.Есенов атындағы Каспий мемлекеттік технологиялар және инжиниринг университетінің ұйымдастыруымен «Тәуелсіз елдің жадыраған жастары!» атты мерекелік кеш өтті.

«Хан Шахар» салтанат сарайында өткен студенттер мейрамына Ш.Есенов атындағы КМТИУ-дің білім алушылары және оқытушылар қауымы қатысты.

Студенттер мерекесінде университеттің оқу ісі жөніндегі проректоры  Маргарита Имандосова мен облыстық жастар саясаты мәселелері басқармасының басшысы Аманғали Нұрдәулетов құттықтау сөз сөйлеп, болашақ мамандарды университеттің атына кір келтірмейтін, үлгілі де білімді студенті, елдің шынайы патриоты әрі лайықты азаматы болуға шақырды.

— Студенттер күнін қасиетті мереке – ел Тәуелсіздігінің 25-жылдығына орайластырып, алғаш рет салтанат сарайында ұйымдастырдық. Бұрын мейрам университеттің қабырғасында өткізілетін. Біздің студенттер облыстық, республикалық және халықаралық байқауларда жеңіс тұғырынан көрініп, үздіктер қатарына ілінген. Республика көлемінде университеттің мәртебесін асқақтатуда. Олардың әрбір жетістігі туралы университетте шығарылатын «Жас толқын» газетінде жарияланып тұрады. Барлық студенттерді мерекемен шын жүректен құттықтаймын, — деді Студенттік парламентінің төрағасы Н.Төреханов.

Салтанатты кеш одан әрі университет өнерпаздарының концерттік бағдарламасымен жалғасты. Жастар өнерін паш етіп, кештің көркін ашты. Концерт соңы би кешіне ұласып, студенттер ерекше толқыныспен, көтеріңкі көңіл-күймен тарады.

Х.ОРЫНБАЙҚЫЗЫ Студенттерді түсірген Талант ҚҰСАЙЫН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.