Маңғыстау облысында мал азығына жұмсалған шығындарды ішінара өтеу үшін Үкімет резервінен бөлінген 1,9 млрд теңге шаруа қожалықтарына беріле бастады, деп хабарлайды mangystaumedia.kz.
Аналық мал басына төленетін қаржылай көмекті алғашқылардың бірі болып алған «Қуандық» шаруа қожалығының иесі Оңайхан Қалиевамен хабарластық.
«Қорамызда 2 сиырымыз, 9 жылқы мен жүзге тарта қой-ешкіміз бар. Бұрын ірі қара бағатын едік, былтырдан бері жылқы бағудың қиын екенін түсініп, ұсақ малға көштік. Жылқы малы тәулік бойы жайылымда жүретін болған соң, шөлейтті Маңғыстауда шөп тауып беру де қиындау. Малымыздың бәрін тіркетіп, күні кеше мемлекеттен берілетін қаржылай көмекті алдық. Шотымызға мемлекеттен көмек ретінде 140 000 теңге түсті. Қуанып жатырмыз», - деді ол.
Облыстық ауылшаруашылық басқармасының басшысы С. Қалдығұлдың айтуынша, Үкімет қорынан бөлінген қаржы 971 шаруа қожалығы мен үйде мал бағып отырған 8 815 тұрғынға беріледі. Айта кетейік, аталған көмек аналық мал басына беріледі.
«Біздің қазіргі есебіміз бойынша, жылқы және түйе малына 9 143 теңге, сиыр малына 9 173 теңге, ал қой мен ешкіге 1 915 теңгеден төленеді. Бұл қаржыны тамыз айында игеруіміз керек. Шаруа қожалықтарынан, жеке мал иелерінен біздің қазір сұрайтынымыз, тездетіп бізге мал басының санын түгендеп берсе дейміз, сонда біз тәртіп бойынша жеке есеп шоттарына тиесілі қаржыны аударатын боламыз», - деді С.Қалдығұл.
Қазір облыста мал басын түгендеп, тіркеу жұмыстары қарқынды жүріп жатыр. Әзірге шаруа қожалықтары малының 84%, жеке үй шаруашылығындағы тұрғындар төрт түлігінің 82% тіркелді.
«Малды тіркеудің арнайы тәртібі бар. Ауылдық комиссиялар өздері реттеп, түгендеп болғаннан кейін, комиссия мүшелері қол қойып, тәртіп бойынша, аудандық комиисия оны растап, бізге жиынтық актісін береді, біз соған қарап қаржылай көмекті төлейміз. Қанша жиынтық актісі түседі, сонша төлей береміз, қаражат бар. Ең бастысы, малы тіркелген болуы керек. Бұл дегеніміз - малды чиптеу, қалған малды сырғалау, белгі тағу», - деді С. Қалдығұл.
Жалпы облыста соңғы алты айдың қорытындысы бойынша төрт түлік малдың есебі 840 000. Соның 460 мыңға жуығы тіркелген.
«Қазіргі таңда «Жасыл дәліз» деген бар, Ауыл шаруашылығы министрлігі соны бізге уақытша ашып берді, осыған орай менің тұрғындардан сұрайтыным, тіркелмеген малын түгел тіркетіп алулары керек. Себебі, тіркелген малға екпе бөлінеді, дәрілер беріледі және мемлекет тарапынан түрлі баытта қаржы бөлінген кезде көп көмегі болады», - дейді Серік Сырымұлы.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
