Табиғат жанашырлары – бірігіңіздер! Осындай үндеу Ақтауда өткен «Маңғыстау табиғаты» қоғамдық бірлестігінің жалпы жиналысында жарияланды. 2004 жылы құрылған қоғамдық бірлестік енді кез келген табиғатты қорғау мен табиғи ресурстарды тұрақты пайдалану ісіне өз үлесін қосқысы келетін азаматтар үшін ашық. Ол үшін WhatsApp номеріне хабарласып, жеке тұлға ретінде «Маңғыстау табиғаты» ҚБ құрамына кіру керек.
Жалпы жиналыста қоғамдық бірлестіктің басқарма мүшелері мен төрағасын сайлау, мүшелік туралы ережені және мүшелік билеттің нысанын бекіту, «Маңғыстау табиғаты» ҚБ «Табиғи орта» Батыс Қазақстан үкіметтік емес ұйымдары өңірлік ассоциациясының құрамына кіру, тұрмыстық және өндіріс қалдықтары бойынша және биоалуантүрлілікті сақтау бойынша қоғамдық комиссиялар құру, «Қаракөл сақшылары» еріктілік экопатруль жасағын қалыптастыру сияқты мәселелер қаралды.
Сонымен қатар Маңғыстауда қарқынды дамып келе жатқан туризм саласының өзекті бөлігі экологиялық туризмнің дамуы мәселелері де назардан тыс қалмайтыны сөзге түрткі болды. Сонымен қатар, ҚБ құрамын кеңейту қажеттілігіне ерекше назар аударылып, облыс аудандары мен Жаңаөзен қаласының тұрғындарын мүшелікке тарту басты міндеттердің бірі. «Маңғыстау табиғаты» ҚБ мүшелерінің бүкіл облыс аумағында болуы табиғатты қорғау бойынша міндеттердің нәтижелі атқарылуына септігін тигізеді.
Басқарма төрағасы болып Қайрат Мұқашев қайта сайланып, ол ниеттес азаматтарға сенім білдіргендері үшін алғысын айтып, жалпы жиналыстың шешімдерін сапалы және уақтылы орындауға бар күшін салатынын жеткізді.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
