"Анаға тағзым" атты алып ескерткіш бой көтерді

Бейнеу ауданында "Білеулі" деп аталатын керуен сарайдың қақпасы мен "Анаға тағзым" ескерткіштері бой көтерді, деп хабарлайды Маңғыстау облысы әкімінің баспасөз қызметі.

Білеулі керуен сарайы - 14 ғасырдан бері сақталған сәулет өнерінің ескерткіші. Жібек жолының бір тармағы, Ноғайлы жолының бойында, Үстірттің Қарақалпақ бөлігінде орналасқан. Солтүстік пен оңтүстікті жалғастыратын керуен жолы болғандықтан, оның бойына әрбір 25 км сайын керуен сарайлар салғызған. Құлаған ғимараттың 8 метрге жуық екі бағанасы мен қақпасы сақталған. Білеулі керуен сарайының екі қабаты батыс пен шығыс қабырғаларының өн бойында жеті-жетіден 14 бөлме бар. Керуен сарайдың ішкі ауласында терең шыңырау құдық болған. Ескерткіштің өн бойында Маңғыстау өңіріне тән айшықтар бейнеленген. Жаңа сәулет нысанының бой көтеруіне аудан кәсіпкерлері Тәжмағамбет Жұбанов, Сұңғат Бөрібайұлы мен Гүлмира Тәжмағамбетқызы ықпал етті.

Сонымен қатар Маңғыстаудың төл перзенті, сәулетші Болатбек Салаев Бейнеу ауданына “Анаға тағзым” ескерткішін сыйға тартты. Жаңа туындыда ананың балаға деген мейірімділігі ерекше көрсетілген. Әйел бейнесі арқылы қазақ қызының инабаттылығын, биязылығын, қазаққа тән мінезін сипаттаған. Ананың оң қолына сәбиін ұстап, алға қарай бір қадам жасап тұрғанының мәні – түн ұйқысын төрт бөліп, бір қолымен бесік, екінші қолымен әлемді тербеткен, сәбиін құнды қасиеттерге тәрбиелеген, ақ сүтімен адамгершілік дарытқан аналарға тағзым ретінде бейнеленген. Ал киім-кешектегі әр ою-өрнек салт-дәстүріміздің болмысын сипаттайды.

“Жас мүсінші ретінде осындай ауқымды тақырыпта үлкен мүсін жасау менің мақсатымның бірі болды. Жұмыс барысында аналарымыздың мейірімге толы бейнесін, ұлтымыздың бай дәстүрін жеткізгім келді”, - дейді Болатбек Еркебайұлы.

Бейнеу ауданында алғаш рет ашылған бұл стелланы қоғамдағы, отбасыдағы ана мәртебесін көтерудің үлкен үлгісі деуге болады.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.