Биыл маңғыстаулық жастар үшін маңызды әрі сәтті жыл болмақ. Себебі Маңғыстау облысының жастар саясаты мәселелері жөніндегі басқармасының тапсырысы негізінде «Азаматтық бастамаларды қолдау орталығы» КеАҚ бірлесе жастардың дамуы мен білім жетілдіруге бағытталған гранттық жобаларды өңір азаматтары іске асырады. Грант жеңімпазы атанып, іске белсене кіріскелі жатқан қордың бірі – «Ақтау студенттер Альянсы» корпоративтік қоры. Олай болса, қордың негізгі қызметі мен міндеті қандай? Жыл соңына дейін жастарды қуантатын қандай жоспарлары бар? Бұл туралы «Ақтау» студенттер Альянсы» корпоративтік қорының атқарушы директоры Гульмира Бурхандиновадан сұрап білдік.
– Қайырлы күн, Гүлмира, өзіңіз қолға алған жоба жайлы айтсаңыз?
– Биыл маңғыстаулық студенттер үшін ерекше есте қалар жыл болады. Себебі, біз, «Ақтау студенттер Альянсы» облыс студенттеріне арналған түрлі, қызықты шараларды өткізуді жоспарлап отырмыз. Мұның барлығы облыстың жастар саясаты мәселелері жөніндегі басқармасының тапсырысы аясында Азаматтық бастамаларды қолдау орталығының қолдауымен берілген гранты негізінде «Жоғары және орта кәсіптік оқу орындарында студенттік өзін-өзі қалыптастыру жүйесін дамыту» тақырыбында жүзеге асады. Негізгі мақсатымыз – жан-жақты және қоғамға пайдалы студенттік өмірді, жастарды мәдени, рухани-адамгершілік құндылықтарға тарту бойынша жүйелі жұмысты ұйымдастыру, студенттердің әлеуметтік өзін-өзі қалыптастыруына жәрдемдесу.
– Нақтыласаңыз, алда қандай жоспарлар бар?
– Оқу жылының басталуына аз ғана уақыт қалды. Қазір ақпараттық жұмыстарды жүргізіп жатырмыз. Тамыз аяқталмай жастармен ашық аспан астында «Open air» тимбилдинг ұйымдастырамыз. Бұл жаздың соңғы күндерін қызықты әрі бос уақытты тиімді өткізуге себеп болатыны анық. Сонымен қатар студенттердің бір-бірімен байланыс орнатып, коммуникация құруға оң әсер етеді. Тимбилдинг аясында жаңа дағды, жақсы қасиеттерді бойға сіңіріп, ұйымшылдықпен алға жылжуға, көшбасшы болуға ұмтылады. Ал қыркүйектен бастап негізгі әрі нағыз қайнаған студенттік өмірдің ішінде боламыз. Бұл біз үшін де, студенттер үшін де маңызды кезең.
– Қыркүйекте студенттерді қалай қуантпақсыз?
– Қуантатын шара көп. Нақтыласам, «Үздік спорттық оқу орнын» анықтау үшін футбол, волейбол, үстел теннисінен жарыс өткіземіз. Суретшілер арасында «Бояулар сыры» байқауын ұйымдастырамыз. Лирикаға, поэзия мен әдебиетке жақын студенттер үшін «Поэзия, менімен егіз ба едің?» атты поэзия кешін ұсынамыз. Одан бөлек студенттер арасында караокеден «Жұлдызды кеш» байқауы, «Домбыра party», «Үздік мобилограф», «Өнерлі жас толқын» студенттер байқауы өтеді. Ең негізгі шара – «Жыл студенті – 2022» байқауы. Аталған байқау арқылы жылдың үздік студентін анықтаймыз. Сонымен қатар «Көшбасшы имиджі», «Бизнес және мотивация» тақырыбында республикалық деңгейде үздік спикерлердің қатысуымен мотивациялық тренингтер өткіземіз.
– Сонымен аталған шаралардан бөлек, жобаның жастар үшін қандай маңызы бар?
– Әрине, жастар үшін маңызды. Менің ойымша, осындай жобалар арқылы және оны орындау барысында студент жастардың белсенділігі мен білімділігіне көз жеткіземіз. Олардың жан-жақты болуына мүмкіндік береміз. Соның нәтижесінде Ақтау қаласында жоғары оқу орындары мен орта кәсіптік оқу орындарында студенттік өзін-өзі қалыптастырудың бірыңғай құрылымы құрылады. Ал жыл соңында студент жастар көшбасшыларының базасы жасақталып, белсенді студенттердің саны артады.
Осы ретте, жастарды студенттік шағын қызықты да белсенді өткізуі үшін біздің қатарға қосылуға шақырамыз. Біз сіздерді жастар орталығында күтеміз. Сонымен қатар студенттердің маңызды мәселелері мен ауқымды жоспары болса, біздің парақшаға хат жолдаса болады.
– Гүлмира, сұхбат үшін рақмет. Сәттілік!
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
