Туризм мен құрылыс саласы мамандарға зәру

Елімізде ең ауқымды мәселе – жұмыссыздық. Облыста да бұл тақырып өзекті. Биылғы жылы өңірде 10 964 адам жұмыссыздық санатында тіркеуде тұр. Былтыр бұл көрсеткіш 11 897 болған. Жұмыссыздық саны айтарлықтай көп болғанымен, жұмысшыларға зәру сала да жоқ еместігін тілге тиек етті жұмыспен қамтуды үйлестіру мониторинг анализ бөлімінің басшысы Лаура Махмутова.

- Жұмыссыздардың жұмыспен қамтылуына қандай мүмкіндіктер бар? Екі қолға бір күрек таппай жүрген азаматтарға мемлекеттік бағдарламалардың көмегі қандай?

- Қала, аудандарда жұмыссыз азаматтардың мәселесімен айналысатын арнайы жұмыспен қамту орталықтары бар. Оны қазіргі таңда барлық тұрғын біледі деген ойдамын. Ал сол орталықтардың жұмысын үйлестіру – біздің міндетіміз. Бос жүрген азаматтар жұмыссыз статусын алу үшін бір ғана құжатпен келіп тіркеледі. Одан кейін ол азаматқа жұмыспен қамту орталықтары бос жұмыс орындарын ұсынады. Егер ұнамаған жағдайда уақытша жұмыс орындарына жібере алады. Уақытша жұмыс орындарына қоғамдық жұмыстар, жастар практикасы жатады. Одан бөлек шағын кәсіп бастағысы келетін тұрғындарды бір айдан үш айға дейін қысқа мерзімді курстарға оқытамыз. Көбіне әйел адамдар кондитерлік өнімдер пісіріп, тігін тігіп, қыз­-келіншектерді әрлеумен айналысқысы келеді. Осы орайда айта кету керек, жұмыссыз азаматтардың еңбекпен қамтылуын қамтамасыз ететін бірден-­бір бағдарлама – нәтижелі жұмыспен қамту және жаппай кәсіпкерлікті дамытудың 2017–2021 жылдарға арналған «Еңбек» мемлекеттік бағдарламасы. Аталған бағдарлама үш бағыт бойынша жұмыс жасайды. Ең бірінші бағыт – оқыту. Биыл 403 адамды қысқа мерзімді курстарға оқытуды жоспарлап отырмыз. Курстар жоспар бойынша сәуір-­мамыр айларында басталады. Екінші бағыт жаппай кәсіпкерлікті дамытуға арналған, яғни кәсіпкерлік негіздерін оқытады. Шағын кәсіп бастағысы келетіндер «Бастау бизнес» арқылы оқиды. Онда кәсіп бастауды, бизнес жоспар жасауды т.б тетіктерін үйретеді. Қолдарына 3 жылға жарамды сертификат беріледі. Биыл 750 адамды оқытуды жоспарлап отырмыз. Оқыған азаматтардың шағын несие және қайтарымсыз грант алуға мүмкіндіктері бар. Қайтарымсыз грантқа тек құрал­-жабдықтар емес, ақшасына қарай ұсақ мал алуға да болады.

- Қазіргі таңда облыс бойынша қай салада бос жұмыс орындары көп?

– Пандемия басталғаннан кейін құрылыс саласы жұмысшыларға зәру болып қалды. Соның салдарынан көп құрылыс тоқтады. Себебі бізде үй салатын көбіне шетел азаматтары. Шекара жабылған соң олар келе алмады. Сондықтан құрылысқа адам көп қажет болды. Бірақ біздің азаматтар құрылыс мекемелерінде жұмыс жасауға құлықсыз. Себебі еңбекақы аз дейді олар. Сондықтан біз ешкімді мәжбүрлей алмаймыз. Одан кейін сервистік қызмет саласында бос жұмыс орындары бар. Мектептерде математика, физика пәні мұғалімдері, логопедтер жетіспейді. Осы орайда айта кету керек, ендігі жерде маңғыстаулықтар туризм саласында жұмыс жасауға көп көңіл бөлу керек деп ойлаймыз. Туризм – күннен-күнге дамып келе жатқан ең ірі сала. Қонақ үйлер, демалыс орындары көптеп салынуда. Сондықтан ол жерлерде де мамандарға сұраныс жоғары. Жалпы бос жұмыс орындары туралы ақпараттар әлеуметтік желілерде ашық жарияланып тұрады. Ондай ақпарат ешқашан құпия болмайды. Бұл тұрғыдан тұрғындар да сауатты деп ойлаймын.

- Биылғы жылдың жоспары бойынша қанша адамды жұмыспен қамту көзделіп отыр?

– Өткен жылы жұмыссыздар саны күрт көбейгендіктен оларды жұмыспен қамту мақсатында «Жұмыспен қамтудың 2020-2021 жылдарға арналған жол картасы» іске қосылды. Бағдарлама аясында әлеуметтік нысандарды жөндеу, жол салу бойынша 3 мыңға жуық тұрғын уақытша жұмыспен қамтылды. Мердігер мекемелерде тұрақты жұмысқа қалуға да мүмкіндіктер болды. Биыл да аталған бағдарлама өз жұмысын жалғастыруда. Биыл Ақтау қаласының жаңа аудандарында 6 мектептің құрылысы басталып жатыр. Ол бойынша 470 уақытша, 820 тұрақты жұмыс орындары құрылады деп жоспарлануда. Жоғарыда айтып өткенімдей, туризм саласы қарқынды дамуда. Сондықтан ол жақта да бірнеше жұмыс орындары пайда болады. Нақтырақ айтсақ, туризм бойынша іске қосылатын ірі жобаларда 7 690 тұрақты жұмыс орны құрылмақ. Ал құрылысына 5 400 жұмысшы қажет. Сондықтан жұмыссыз жүрген азаматтар беріліп жатқан мүмкіндіктерді пайдаланып жұмыспен қамтылса деген ниеттеміз.

- Сұхбатыңызға рақмет.

Айгүл ОРЫНБАЕВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.