Қазақстандықтар интернеттен не іздейді?

©

Жылдағы әдеті бойынша Google, Youtube пен Яндекс 2018 жылы қолданушылардың интернетте іздеген сұратуларының рейтингін жасады. Сонымен Қазақстан халқы биыл интернетте не іздеді? 2018 жылы Қазақстанда Google арқылы Ресейде өткен әлем чемпионаты туралы мәліметті көп іздеген. Айта кетелік, футбол чемпионаты туралы ақпаратты тек қазақстандықтар ғана емес, бүкіл әлем іздеген болып шықты. Қазақстандықтар Google арқылы көп іздеген сұратулардың арасында «Күнделік кз», «Мажор 3 маусым», «қазақша-орысша сөздік», «Ораза 2018 кестесі» сөздері де бар. «Жыл адамы» танымал мәнерлеп сырғанаушы, 2018 жылдың шілде айында дүниеден өткен Денис Тен болды. Екінші орында – АҚШ-тың Лодерхилл қаласынан шыққан рэпер Xxxtentacion тұрса, үздік үштікті аралас жекпе-жек шебері, ресейлік Хабиб Нурмагомедов аяқтайды. Қазақстан халқын сондайақ Стивен Хокинг, Стэн Ли, Конор Макгрегор, Иосиф Кобзон, Хорватияның Президенті Колинда Грабар-Китарович, Меган Маркл туралы ақпарат қызықтырған. Айта кетелік, Google рейтингі бойынша бүкіл әлем бойынша «Жыл адамы» Гарри ханзаданың жұбайы Меган Маркл атанған екен. 2018 жылы қазақтар қандай кино көрді десеңіз, Веном құбыжық туралы кинокомикс көп ізделіпті. Сондай-ақ «Кекшілдер: Мәңгілік соғыс» (Avengers: Infinity War), отандық «Бизнес по-казахски в Америке» фильмі, «Құбыжықтар демалыста» мультфильмі туралы көп сұралған. Биыл қазақстандықтар ресейлік «Мажор», «Полицейский с Рублёвки», «Ивановы Ивановы», «Гранд Леон», қытайлық «Жұлдыздар жауған бақ» (Meteor Garden) сериалдарын көп іздеген. Google қолданушыларының арасында Қазақстандағы ең танымал шоу ресейлік «Холостяк» болып шықты. Сондай-ақ қазақтар көрші елдің «Песни на ТНТ», «Замуж за Бузову», «Битвы экстрасенсов» мен «Евровидение 2018» сияқты шоуларын қызыға қараған. Интернетте көп ізделген шоулардың арасында 6 орынға отандық «Қалаулым» жайғасқан. Интернеттен қазақ жұрты теміржол билеттерін жиі сатып алады екен. Сондай-ақ Алматы қаласынан үй мен Қарағандыдан пәтер, ұшақ пен киноға билет іздегендер де бар. Youtube-ке келсек, 2018 жылы Қазақстанның интернет қолдаушылары, Alem Band - Қалауым, Jah Khalib - Медина, Қайрат Нұртас & Заңғар Нұртас - My Universe, KeshYou & Baller - Swala La La әндерін көп тыңдаған. Ал видеолар бойынша отандық «Брат или Брак» комедиясы мен «Өнер қырандарының» қойылымдары көп қаралған. Яндекстің тізіміне сүйенсек, қазақтарды биыл футболдан әлем чемпионаты, Пхенчхандағы қысқы Олимпиада мен Макгрегор мен Нурмагомедовтің жекпе-жегі көп қызықтырған. Яндекс қолданушылары Хабиб Нурмагомедов, Ноа Сайрус, Аман Төлеев сияқты танымал тұлғалар жайлы ақпаратты жиі іздеген.