Мәжіліс депутаттары Қарақияға келді

«Бес әлеуметтік бастамасын» халыққа кеңінен түсіндіру және оның жүзеге асырылу жолдарын баяндау мақсатында Маңғыстау өңірінде іс-сапармен жүрген ҚР Парламенті Мәжілісінің бір топ депутаттары Тарас Хитуов, Ирина Унжакова, Геннадий Шиповских және Бақытгүл Хаменовалар 2 сәуір күні Қарақия ауданына келді. Ата салтын ардақ тұтып, әуелі Оғландыдағы Бекет ата мешітіне барып қайтқан халық қалаулылары аудан орталығындағы Қарақия кәсіптік-техникалық колледжінде студенттермен кездесті.

Кездесуді аудан әкімінің м.а Қ.Беков ашқан­нан кейін Парламент Мәжілісінің экология мәселелері және табиғат пайдалану комитетінің мүшелері И.Унжакова, Г.Шиповских, Б.Хамено­валар Елбасының бес бастамасында көрсеткен жастарға, олардың білім алуы мен жатақхана мә­селесіне, айлық жалақысы аз топтардың салығын азайту сияқты әлеуметтік маңызы бар мәселелерге жеке-­жеке тоқталса, Мәжілістің экономикалық реформа және өңірлік даму комитетінің мүшесі, осы ауданның тумасы Тарас Киікбайұлы жер­лес бауырларын білімге, бірлікке, отансүйгіштік пен жаңашылдыққа шақырып, жастар тарапынан қойылған сұрақтарға жауап берді. Жастар кезде­ суге көптеп келіп, депутаттарға көкейлеріндегі са­уалдарды қойып, еркін сұхбат өткізді.

Бұдан соң депутаттар мен аудан басшылығы, ардагерлер бастаған топ Қарақия ауданы әкімдігінің үлкен акті залында аудан активімен кездесті. Әуелгі сөзді алған Тарас Киікбайұлы туған елімен батысша амандасып, ел мен жерге құт­-береке тіледі. Елбасы көтерген әлеуметтік бес бастаманы тарқата келе газбен қамту мәселесіне тоқталды. Маңғыстау өңірі – толықтай газбен қамтылған аймақ. Алайда сонау ит арқасы қиянда жатқан азғантай тұрғыны бар Аққұдық ауылына газ құбырын тартудың қиындығы жөніндегі аудан тұрғыны К.Ізбергеновтың сауалына нақты жауап берілді. Бұдан соң депутат Бақытгүл Қайыржанқызы сөз кезегін алып, рухани жаңғырудың, Жолдаудың, реформаның, бес бастаманың барлығы да айна­лып келгенде – ел игілігі үшін болғандықтан ел саясатын сол елдің өзі қолдап, бірлік, белсенділік танытумен жүзеге асатындығына тоқталды. Жи­налған қауымға орталықтың сәлемін жеткізіп, жөн сөздің жүйесін келтірді. Ал қазақшаға судай қы­зылордалық депутат Г.Шиповских отаншылдықпен тілге құрмет көрсетудің үлгісі бола білді. Аудан халқымен кездесуден кейін депутаттар дәл осы ау­дан орталығына жақын орналасқан Құрық портына барып, жұмыс барысымен танысты. Еліміздің алыс батысында жатқан аядай ауданның орталығына жақын орналасқан Құрық порты ­ халықаралық мәні бар, сондай­-ақ Еуразияның логистикалық картасында ерекше маңызға ие нысан. Мұндай порттың жүзеге асуы, әрине, іргелес жатқан Құрық ауылы мен ауданның, өңірдің өркендеуіне өз ық­палын тигізетіндігі анық.

Шынар КЕНДІН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.