Құрық ауылында үстел теннисінен аудандық турнир өтті

Маңғыстау облысы дене тәрбиесі және спорт басқарма­сының мемлекеттік тапсырысы бойынша, «Спешиал Олимпикс» қоғамдық-­қайырымдылық бірлестігінің Маңғыстаудағы филиалының ұйымдастыруымен «Дені сау­дың – жаны сау» жобасы аясында мүмкіндігі шектеулі және қа­лыпты балалар арасында үстел теннисінен аудандық турнир Құрықтағы №6 орта мектепте өткізілді.

Турнирдің ашылуына Қазақстан «Спешиал Олимпикс» республикалық қоғамдық бір­лестіктерінің Маңғыстаудағы филиалының директоры М. Жа­рылғас, аудандық білім бөлімінің басшысы К. Байбосинова, ау­дандық мәдениет, денешынықтыру және спорт бөлімі басшысы Д. Атағараев, №6 мектеп директорының тәрбие жөніндегі орын­басары Ж.Берішбаева және «Жігер» мүгедектер спорт клубы жетекшісі Қ.Тілеуов, дене тәрбиесі пәнінің мұғалімі С. Жақсылық пен мүмкіндігі шектеулі жандар, мектеп оқушылары қатысты. Спорттық шараның ашылу салтанатында сөз алған Марина Ыстыбайқызы:

- Тек қана рухы мықты, дені сау халық үлкен жетістікке жетеді. Сондықтан болашақта үлкен маман иесі болуы үшін, алдарына мақсат-­мүдде қойып, ел тұғырының биіктігін сақтайтын ұрпақ тәрбиелеу біздің қолымызда,­ - деді. Шара барысында аудандық білім бөлімінің басшысы К. Байбосынова:

- Қазіргі уақытта мүмкіндігі шектеулі жандардың спортқа деген ынталарын дамытып, жігерлендіру үлкен міндет болып отыр. Соның арқасында көптеген спорттық шаралар жүзеге асырылу­да. Осындай балалардың күш-­қайратын оятатын сайыстардың қатары көбейіп, жас спорт­шыларымыз жүлделі орындардан көрінсе, – де­ген ізгі тілегін айтып, жас­тардың бос уақытында спортпен шұғылдануына кеңес берді.

Ал «Жігер» мүгедектер спорт клубы жетекшісі Қ. Тілеуовтің ай­туы бойынша, турнирдің негізгі мақсаты – жастар­ды спорттық салаға тарта отырып, олардың өнерге деген құлшынысын артты­ру және өмірге деген оң көз­қарастарын қалыптастыру, сонымен қатар әлеуметтік және рухани дем беру болып табылады.

Жарыс өте қызықты әрі тартысты өтті. Қалыпты спортшылар­ мен сайыс додасында болған мүмкіндігі шектеулі спортшылар қоғамның толыққанды мүшесі ретінде бар күш­қайратын жұмсап атсалысты. Шара соңында «Жігер» мүгедектер спорт клубы же­текшісі Қ.Тілеуов пен мектептің дене шынықтыру пәнінің мұғалімі С. Жақсылық үстел теннисі ойынын үйретуге қосқан үлесі үшін Алғыс хаттармен марапатталды.

Ұлдар арасында өткен теннис жарысынан 1­ орынды А.Арқалықов, 2 орынды А.Доғдырбаев және 3 ­орынды Ж. Чандиевтер қанжығасына байлады. Ал қыздар арасында өткен теннис сайысында 1 ­орынды Н. Тұрниязова жеңіп алса, 2­ орынды А.Бабасова иеленіп, 3 ­орынға Ш. Қажымұқан жай­ғасты. Тартысқа толы өткен спорттық сайыста оза шапқан же­ңімпаздарға диплом және кубоктар табысталды. Жүлделі орын­ға ие болған спортшылар шексіз ризашылықтарын білдіріп, көңілді тарқасты.

Фариза ХАЙДАРОВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.