Өзбекстанда қол күресінен жасөспірімдер, жастар, ерлер, әйелдер және мүмкіндігі шектеулі спортшылар арасында өткен 20-шы Азия чемпионатында маңғыстаулықтар тоғыз медаль, оның ішінде екі алтынды жеңіп алды. Бір спортшы халықаралық дәрежедегі спорт шебері атағын алды, деп хабарлайды mangystaumedia.kz облыстық ҚКО-ға сілтеме жасап.
Азия чемпионатына Жапония, Қырғызстан, Пәкістан, Тәжікстан, Иран, Ауғанстан, Сауд Арабия, Индия мемлекетінен 800-ден астам спортшы қатысты. Жарыс сәуір айының 23-30 аралығында өтті.
Маңғыстаулық спортшылар Азия чемпионатынан бір алтын, үш күміс, екі қола медаль иеленді. Жеткіншектер(қыздар) арасында 45 келі салмақ дәрежесінде Гаухар Жанғазы 3-орынға ие болды. Жасөспірімдер(ұлдар)арасында 50 келі салмақ дәрежесінде Дәулет Абдулла 2-орын алды. 80 келі салмақ дәрежесінде Нұрсәт Жеделбай 2-орын иеленді. Ал жастар арасында 55 келі салмақ дәрежесінде Рухани Мұстафа 3-орын алса, 85 келі салмақ дәрежесінде Ануар Ершенбаев 2-орынға ие болды. Ерлер арасында 70 келі салмақ дәрежесінде Ыбырай Шолпанов Азия чемпионы атанды.
Ал мүмкіндігі шектеулі спортшылар бір алтын, бір күміс, бір қола медаль жеңіп алды. Атап айтқанда, VI(көру қабілеті нашар) бойынша Дәурен Айшуақ алтын жүлде алса, PIU(ПОДА) бойынша Нұртуған Қожабаев 3 орын иеленді. Сондай-ақ, ерлер арасында PIUH(сол қол) бойынша +85кг салмақ дәрежесінде Мерей Тажигулов күміс жүлде иегері атанды.
- Азия чемпионатында өңір спортшылары керемет нәтиже көрсетті. Жарыс жоғары деңгейде өтті. Ерекше атап өтетін жайт, Азия чемпионаты атанған Ыбырай Шолпанов халықаралық дәрежедегі спорт шебері атағын алды және ол осы дәрежеге жеткен өңіріміздегі алғашқы спортшы, - деді қол күресі және гір спортының федерация президенті Мұстафа Нарымбаев.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
