Белгілі сазгер, дирижер Қуат Қонашевті еске алды
[ 2017 ] 27 қазан, 07:53 | Мәдениет
Абай атындағы мәдени-демалыс кешенінде жерлесіміз, белгілі сазгер, дирижер, қазақ өнерінің жанашыры Қуат Қонашевті еске алу кеші өтті.
Қуат Қоңырұлы – Маңғыстау облысының Ұштаған ауылында туған. Бала кезінен музыкаға құштар болған ол есейе келе өнер жолын таңдап, осы бағытты аянбай тер төгеді. Бүгінде ол негізін қалаған «Ақтау сазы» фольклорлық ансамблі көптеген мемлекеттік жəне халықаралық байқаулардың жеңімпазы атанып жүр.
Сахнаға көтеріліп, «Шығармашылық қанаттары» аталған өнер кешін ашқан облыстық мәдениет басқарамасы басшысының міндетін атқарушы Пания Сармурзина мен Ақтау қалалық мәдениет және тілдерді дамыту бөлімінің басшысы Гүлжазира Алдашева марқұмның отбасы мен оның өнерін жалғастырушыларға игі тілектерін жеткізді.
Небәрі қырықтың қырқасынан аса бере қыршын кеткен азаматтың үзеңгілес достары мен әріптестері, бауырлары мен жанына жақын адамдары естеліктер айтып, сыр ашты. Сондай-ақ бұл кеште марқұм болған өнер иесін еске ала отырып, оның ізін басқан өнерпаздардың өнерін тамашалауға мүмкіндік болды.
Арнайы қойылыммен басталған концерттік бағдарлама барысында Қуаттың ұлы Ибрагим Қонашевтың «Әкеме арнау» монологы оқылып, кеш «Ақтау сазы» ансамблі мен өңір өнерпаздарының ән-биімен жалғасты.
Бүкіл аймаққа есімі танымал болған Қуат Қоңырұлы туралы «Ақтау сазы. Өнері өмірі» атты естеліктер кітабы жақында жарық көрген екен. Кеш қонақтары Қуаттың сәулелі ғұмырындағы жарқын фотосуреттер мен оның өзі жазып кеткен партитуралар енген осы кітаппен танысып, жылы лебіздерін білдірді.
Валентина ҚОЗЫБАҚОВА
[gallery td_select_gallery_slide="slide" ids="40193,40192,40191"]
926
Маңғыстау Медиа
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
