Санкт-Петербург қаласынан келген ортопед-травмотолог Андрей Кольцов қол-аяғында ақауы бар бүлдіршіндерге ота жасады. Операция Маңғыстау облыстық көпбейінді балалар ауруханасында өтті. Бұл туралы Маңғыстау облысы денсаулық сақтау басқармасының баспасөз қызметі мәлемдеді, - деп хабарлайды mangystaumedia.kz сайты.
- Ақтау қаласына алғаш рет келуім. Ал Қазақстанға 8 жылдан бері 2-3 реттен келіп жүрмін. Басты мақсат - қазақстандық әріптестеріммен тәжірибе алмасу және бүлдіршіндерге көмектесу. Бүгін және ертең ақтаулық дәрігерлермен бірлесіп аяқтың буындары мен байламдарының туа біткен және жүре пайда болған ақауы бар балаларға ота жасаймыз, - деді травматолог-ортопед Андрей Кольцов.
Айта кетейік, тәжірибе алмасып, күрделі ота жасау "Жұлдызай" медициналық оңалту орталығының қолдауымен, "Mumkindik" атты бағдарламаға сәйкес жүргізіліп жатыр.
- Біз балаларға невралогиялық және кардиологиялық бағыттар бойынша оңалту жұмысын жүргіземіз. "Mumkindik" жобасы аясында бүлдіршіндердің өмір сүру сапасын жақсартуға, әртүрлі ауру салдарынан бұзылған дене ақауларын оңалтуға мүмкіндік береміз. Жобаның арқасында отандық хирургтар әлемдік стандарттар деңгейінде тәжірибе алуы үшін жақын және алыс шетелдерден осындай шеберлік сағатын өткізуге білікті мамандарды шақырамыз. Бүгін, міне, Маңғыстау облыстық балалар ауруханасында ота жүргізіліп жатыр. Айта кетейік, "Mumkindik" жобасы арқылы операциядан кейін біздің орталықта балалар үшін тегін және толыққанды оңалту жүргізіледі, - деді "Жұлдызай" медициналық оңалту орталығының директоры Ұлжалғас Мұханбетова.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
