«Bir jer»-де кездескенше!

Жаңаөзендік жас кәсіпкерлердің саны күн санап артуда. Бұл әрине қуанышты жағдай. Жеке кәсібімді ашамын, өз ісіммен ай­налысып, табыс табамын деушілерге қазіргі таңда қолдау артып келеді деуге болады.

Осындай іскер жігіттердің бірі - Асқар Қойлыбаев. Мұнай және газ колледжінің түлегі Асқар Жаңаөзен тұрғындары үшін «BIR JER» деп аталатын антикафе ашқан. Кафенің аты ай­тып тұрғандай басқа жерлерден ерекшелігі - бұл ең алдымен тамақтану орны емес, жастардың бір-бірімен танысып, еркін ой-пікір алмасу алаңы болмақ. Тәулігіне 17 сағат келушілерге қызмет көрсететін кафе­де шай үстінде әңгіме-дүкен құрып, кітап оқуға, кино көріп, музыкалық аспаптармен қатар әртүрлі ойындар ойнап сергу үшін бар жағдай жасалған. Кішкентай бүлдіршіндерге арналған ойын алаңы да бар. - Қаламызда дәмханалар, демалыс орындары аз емес. Бірақ олардың барлығы дерлік тек тамақтанатын орындар. Ал менің мақсатым - жастар еркін атмосферада бір- бірімен таныссын, өз өнерлерін ортаға сал­сын, сол арқылы білім көкжиектерін кеңейтсін деген ой болды. Кафені ашуда әрине, әртүрлі қиындықтар болды. Қолдау көрсеткен отба­сыма, жұбайыма және достарыма алғысымшексіз. Мен біздің жастардың пайдалы іспен айналысып, қаламызды көркейту үшін өз үлестерін қосса деймін. Алдағы уақытта қалалық жастар орталығымен тығыз қарым- қатынаста жұмыс істейміз деп ойлаймын, - деген кәсіпкер жігіт, - табысқа жету үшін адам пысық және үнемі ізденіс үстінде болуы керек дейді. Асқардың тың бастамасына сәттілік пен табыстар тілей отырып, барша жаңаөзендік жастар мен қала қонақтарын ««BIR JER»-ге шақырамыз.

 Айжан НАСЫРОВА