Түпқарағанда Жастар жылында «Отбасы-life» жобасы жүзеге асады

©

Жастар жылында жаңа бастаманы қолға алған түпқарағандықтар жаңа жобаны таныстырды. Аудан әкімінің қолдауымен, аудандық сот жүйесінің бастамасымен қолға алынған жоба «Отбасы-life» деп аталады. Аты айтып тұрғандай, бұл жоба отбасы мәселелеріне қатысы. Шаңырақ көтеруге шешім қабылдаған жастарды отбасылық өмірге бейімдеуге түрлі бағытта кеңестерін беріп, ажырасудың алдын алуға бағытталған, отбасы мәселелесін сотқа жеткізбеуді қолдайтын бірегей жобаның жеті тұғырдан тұратын отбасы кодексіне дейін жасақталған. Жобаны таныстырған аудан әкімдігі бұл жұмыстың бастама ретінде қалып қоймай, ары қарай түрлі бағыттар бойынша жүзеге асатындығын жеткізді. «Отбасы-life» жобасы ая­сында ұйымдастырылып, ауданның мәдени қызметкерлері мен әуесқой әртіс жастарының қатысуымен түсірілген «Бақытымды бағалаймын» бейнероликтің таныстырылымы да өтті. Аталмыш ролик бүгінде аудан тұрғындарына әлеуметтік «Whats aрp», «Facebook» желіcі арқылы кеңінен тарап үлгерді. Кеңінен таратуды ғана емес, ой салуды мақсат ету арқылы жасалған бір ғана бейнероликтің де біршама жастарды ойландыруға сеп­тігін тигізетіндігіне сенімдіміз. Түпқараған ауданы әкімдігі мен Түпқараған аудандық сотының бірлес­кен жобасы «Отбасы-­life» таныстырылымы үшін аудан әкімідігінің мәжіліс залында «Татуласу: сотқа дейін, сотта» тақырыбында дөңгелек үстел бо­лып өтті. Дөңгелек үстелге Маңғыстау облысы соттар әкімшісінің басшысы Н.Алмашов, Түпқараған ауданы әкімі А.Хамиев, Түпқараған аудандық сотының төрағасы Н.Тұржанов, судья Е.Бегенов және жергілікті атқару ор­гандары мен аудан жастары арнайы қатысты. Дөңгелек үстел барысында аудандық сот төрағасы Н.Тұржанов отбасының ар­намысы кодексін та­ныстырып өтіп, аталған кодекс АХАТ бөліміне неке құруға өтініш білдірген азаматтарға табысталу үшін жасақталғанын жеткізді. - Жобаның мақсаты – отбасы құндылықтарын сақтау, ерлі­-зайыптылар­дың арасындағы некені бұзуды болдырмау, оның алдын алу, кәмелетке толмаған балалардың толыққанды отбасында тәрбие алуына ықпал жасау және жаңадан отбасын құруға ниет білдірген азаматтарға бағыт-­бағдар беру, ­- дейді бірегей жобаны қолдап отырған аудан әкімі Айдос Хамиев. Жоба таныстырылымында сөз алған жоба бастамашысы, аудандық сот төрағасы Н.Тұржанов: -­ Ажырасу бойынша түскен арыздың 60 пайыз ша­масында татуластыру жұмыстарын жүргіздік. Бұл – медиация, сотқа жет­кізбей дауларды шешу, сот үстінде болса да татуластыру сынды Елбасы бастамасымен қолға алынып отырған жұмыстарды үйлестіру. Бұл сот үшін жақсы көрсеткіш болғанымен, жастарға қоғамдық, ағайын­туыстық қолдау мүлдем аз екенін аңғардық. Сондықтан осындай шараларды ұйымдас­тырып, оны жүзеге асыруға шешім қабылдадық. Бұл бастамамызды қол­даған аудан әкімдігіне де алғысымыз шексіз. Бастысы, аудан тұрғын­дарын, отбасылардың бірлігін сақтауда септігін тигізеді деген сеніміміз бар. Негізгі мақсатымыз да – сол. Ажырасудың алдын алу. «Отан отбасы­нан басталады» демекші, елдің бірлігі де осы отбасы бірлігінде, отба­сындағы тәрбиеде жатқаны белгілі,­ - дейді.

Милана ЕЛЕУСІНОВА