Өз кәсібін бастады

Өз кәсібін ашып, өзі сүйген ісімен айналысу бүгінде көбінің мақсатына айналып келеді. Бала күнінен өз сұлулық салонын ашуды армандаған Ақкүріш сол арманын бүгінде мем­лекет берген мүмкіндікпен жүзеге асыруда.

Өзі де бәрін бір күні мемлекеттік бағдар­лама береді екен деп отырмағаны анық. Алдымен жолдасының көмегімен өз кәсібін дөңгелету үшін жер орын алып, оған құрылыс жүргізеді. Бала күтімінде отырған 3 баланың анасы аудандық жұмыспен қамту орталы­ғына жұмыссыз ретінде тіркеледі. Алайда жұмыссыздар үшін де бизнес бастауға бола­тын тетіктер бар екенін білмейді. Аталмыш орталық Ақкүрішті жұмыссыз ретінде тіркеп қана қоймай, бизнеске бастапқы қадам жа­сауына да жол салады. Өзі де көп ойланып, іштей дайындалып, ашқысы келіп жүрген сұлулық салонын ашпас бұрын кәсіпкерлік негіздерін білгісі келетін. Бизнесті бастау мен оны жүргізуді қалай үйренуге болатынын ойлап жүрген кейіпкерімізге бұл жоба орай келе қояды. Халықтың әл­ауқатын көтеру бағытында жасалып жатқан «Атамекен» ұлт­тық кәсіпкерлік палатасы бастамасының «Бастау­-Бизнес» жобасының қатысушысы ретінде кәсіпкерлік негіздерінен 1 ай білім алады. Дәрістерін тыңдап, палатаның көме­гіне жүгінген ол бірден бизнес-­жоспар жасау көмегіне осы жоба арқылы жүгінеді. Араға көп уақыт салмай, «Ауылшаруашылығын қолдау» қоры арқылы 6 пайызбен 1 500 000 теңге несие алуға мүмкіндік алады. Алған не­сиесіне толықтай кәсібін бастау үшін арнайы салонын жабдықтауға кіріседі. Шаш қию, тырнақ сәндеу сияқты түрлі сұлулық қыз­меттерін көрсететін «Ақкүріш» салоны шаш қыстырғышынан бастап бас жуатын, кеп­тіретін, сәндейтін түрлі құрылғылар алады.

- Жұмыссыз ретінде аудандағы жұмыспен қамту орталығына тіркелуге барған едім. «Нәтижелі жұмыспен қамту және жаппай кәсіпкерлікті дамытудың» 2017-­2021 жыл­дарға арналған мемлекеттік бағдарламасы барын, ол бағдарлама арқылы «Бизнес­Бастау» деген кәсіпкерлікке оқыту курстары жүргізіліп жатқанын және ол курстар осы біз сияқты жұмыссыздар үшін ұйымдастырылып отырғанын сол орталықтан естідім. Орталық мені тіркеп, әрі сол жобаға қатысуыма жол­дама берді. Көп уақыт жоғалтпай, аз құжаттар жинап, 1 ай курстан өттім. Ең бастысы – сертификат иелендім. Бұл сертификаттың қаржылай қолдау ұйымдарынан бизнес жо­баларымызды ұсына отырып, несие алуға мүмкіндік беретіні қуантты. Мен сияқты кәсіптік мамандығы жоқ әрі үйде отырған жандар үшін кәсіп бастауға, оны жүргізуге бұл бағдарламаның берері көп деп есеп­теймін. Бүгінде өзіңіз көріп тұрған салонды ашып, тұтынушылармен жұмысты бастап жатырмын. Жаман емес, жәйлап естіп, біліп келіп жатқан адамдар бар. Алған несиемді 6 айдан кейін ғана төлей бастаймын. Ол де­геніңіз – енді бастап жатқан жас кәсіпкер үшін үлкен қолдау. Алдағы уақытта жаныма көмекші қыздар алып, жұмыспен қамтуды да ойластырып отырмын, -­ дейді өз кәсібін бастаған Ақкүріш Сариева.

Милана ЕЛЕУСІНОВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.