Үздіктер қатарындағы Асхат
[ 2017 ] 8 қыркүйек, 05:45 | Қоғам
Қашан көрсең қалбалақтап кетіп бара жатады. Зырылдап жүргені – жұмыстың реті. Қолы да бос болмайды. Резеңке қолғапты киіп, үлкендеу қобдишаны көтеріп жүреді.
Бұл – «Өзенэнергомұнай» басқармасы Өндірістік-энергетикалық қызмет №2 релелік қорғау және автоматтық қорғау цехының электр жөндеушісі Асхат Тасқараев. Қобдиша толы тоқтың құрал-жабдықтары. Жөндейтіні – істен шыққан өндіріске қажетті құрылғылар.
5-ші дәрежелі маман Асхатқа артылған жүк ауыр. Қауіпсіздік шараларын қатаң сақтау – басты назарда. Оның қауіпі мол электр жөндеушісі болып еңбек етіп келе жатырғанына 7 жылдан асты. Арнаулы оқу орнын үздік тәмамдаған маман. Осы жұмысын атқара жүріп те ол үздіктер қатарынан көрініп жүр. Өткен жылдан бастап мұнайшылар арасындағы кәсіби байқауда бағын сынауда. «Үздік маман-2016» байқауынан басқарма аралық жарыста ІІІ орынды иеленсе, биылғы сыннан І дәрежелі жүлдені еншіледі. Электр жөндеушісі Асхатты алда байқаудың 3-ші бөлімі күтіп тұр. Жоспарлы сында өзі қызмет ететін «Өзенмұнайгаз» АҚ абыройын арттырып, өзінің мамандығы бойынша кәсіби білім-білігін мүлтіксз көрсетуге дайындалып жүр.
Мұнай-газ өндірісіндегі аса қажетті мамандықтың бірін меңгеріп, оны тиісті дәрежесінде атқарып жүрген Асхат Тасқараевтан күтер үміт зор.
Б.Бөбекбай
791
Маңғыстау Медиа
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
