Түпқараған ауданы бойынша 1 маусымнан бастап 11 мектептің жанынан балаларға арналған арнайы лагерь жұмысын бастады, деп хабарлайды mangystaumedia.kz Қоғамдық коммуникация орталығына сілтеме жасап.
Жоба балалар жылы аясында арнайы ұйымдастырылған. Балалардың жазғы демалысы 2 бағыт бойынша ұйымдастырылып жатыр.
Оның біріншісі жазғы сауықтыру және балалардың бос уақытын тиімді пайдалану бағытында болса, екіншісі еңбекпен, танымдық шығармашылық, спорттық, туристік шаралармен қамту бағыты бойынша қолға алынған болатын. Солардың ішінде ерекше тоқталып өтетін Ғ.Айдаров атындағы №1 мектеп-лицейі жанынан ашылған «ETNO-2022» жазғы тынығу «Қазына» этнолагері.
Түпқараған ауданының Ғ. Айдаров атындағы №1 мектеп-лицейінде «Қазына» этнолагері мектеп жасындағы балаларды ұлттық өнерге баулу, дәстүрлі ән мен қолөнерін үйрету, ұлттық ойындар ойнату, ұлттық тағам түрлерінің жасалу технологиясын меңгертіп, туған өлке тарихымен таныстыру арқылы жас ұрпақтың бойына рухани құндылықтарды сіңіру мақсатында өз жұмысын бастады. Сондай-ақ, қолөнер, дәстүрлі ән-би өнері, ұлттық ойындар, ұлттық тағам түрлерін әзірлеу, туған өлке тарихы, қылқалам үйірмелері де бар.
Мектеп ұжымынан құралған 12 тәрбиеші, 15 үйірме жетекшісі «Үркер», «Ақберен», «Бойтұмар», «Алтын сақа», «Мұзбалақ», «Сәйгүлік» тобымен бірге тынығу алаңы жұмысының жоспары бойынша балалардың алғашқы күнін мектеп алаңына киіз үй тігіп, жер ошақ құрып, қонақтар қабылдап бастады. 14 күнге созылған балалардың жазғы демалысында 150 бала қамтылуда.
- Бірінші күні оқушылар таңғы жаттығуды «Қара жорға» биімен бастады. Таңғы асқа балаларға қазан ошақта пісірілген ыстық бауырсақ пен шұбат ұсынылды. Ошақта қалған шоққа көмілген күрең қызыл таба нан да дастарханға жеткізілді. Тынығу алаңының ашылу құрметіне мерекелік концерт ұйымдастырылды. Осындай үрдісімен күнде жалғасын тауып жатыр, - дейді ұйымдастырушылар.
Тынығу алаңына арналған он төрт күн әр бағыт бойынша жоспарланған ісмермен, сәулетшімен, құсбегімен, атбегімен, суретшімен кездесу балалардың ұлттық құндылықтарды танып-білуіне зор ықпалын тигізеді деп күтілуде.
Одан бөлек, Ақшұқыр мектеп-лицейі жанынан «HOLIDAY» жазғы демалыс лагерінде этноауыл күндері, А.М.Горький мектеп-лицейі жанынан «Әскери-туристік, палаталық лагері», М.Әбдіхалықов мектеп-гимназиясында «SMAEL-2022» инклюзивтік оқушыларға арналған үйірмелік лагері және қалған мектептерден еңбек, оқырман, экологиялық бағыттағы лагерь жұмыс жүргізетін болады.
Суреттерді түсірген Талант Құсайын
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
