Алаштың арда азаматтары еді

Күнтізбедегі 31 мамыр – Саяси қуғын-сүргін құрбандарын еске алу күні. Бұл күн – қазақ баласы көкірегін қарс айырып, бір сәт күрсінетін күн. ХХ ғасырдағы саяси қуғын-сүргін – мыңдаған жазықсыз жандардың қаны мен көз жасына жуылған тарихтың шерлі беттерінің бірі. Бүгінгі ұрпақтың борышы – осы жылдары жазықсыз құрбан болған азаматтардың есімін ұмытпау һәм оларды мәңгі есте сақтау

Осы тұста атаулы күннің қадірін арттырған рухани еске алу шарасы кентімізде «Ашаршылық пен қуғын-сүргін құрбандарына арналған ескерткіш» алдында жыл сайын митинг өтетін. Аудан әкімі бастаған топ ескерткіш алдына гүл шоқтарын қойып, бір минут үнсіздік жариялап, одан әрі ашаршылық пен қуғын-сүргін құрбандарына Құран бағыштап, дұға жасаушы еді. Биыл елімізде жарияланған төтенше жағдайдың әсерінен мұндай шараларға да тоқтау қойылды. Әрине, бұл – халық денсаулығы үшін жасалған амал, әйтсе де бұл қуғын-сүргін құрбандарын еске алып, тағзым етуге кедергі емес.

Бүгінгі жаппай саяси репрессияның құрбаны болған адамдарды еске алу Қазақстан тарихының трагедиялық беттерін еске түсіруге мүмкіндік береді. Біздің алдымызда тарихи естеліктер феноменін сақтау міндеті тұр. Себебі тарихи дерекке көз жүгіртсек, қазақ даласы бойынша 100 мыңнан астам адам қуғындалып, 25 мыңы атылды. Миллионға жуық қазақ туған жерін тастап, босып кетуге мәжбүр болды.

Қоғамның тұтастығы қай кезде де ішкі татулық пен берекеден бастау алған. Ынтымағы жарасып, түрлі ұлыстың басын қосқан қастерлі қазақ топырағы бейбітшіліктің қара шаңырағына айналды. «Қиындық атаулыны жеңетін бір-ақ күш бар, ол – бірлік» демекші, ел басына күн туған замандарда халқымызды ұлт ретінде сақтап қалған ынтымағы мен бірлігі десек, артық айтпағанымыз болар.

Иә, түйіндей айтқанда, Кеңестік қызыл империя қазақтың мәйегін орып, жантағын қалдырды. Атылғандардың дені иісі қазақтың бетке ұстар, көш бастаушы ағартушы, ұлт көсемі болуға лайықты Алаштың арда ұлдары еді. Қаншама зобалаң жылдарды бастан кешірген арда азаматтардың айтқан зары, кешкен мұңы, жүріп өткен тар жолдары – бүгінгі ұрпақтың мәңгі есінде.

Күнсұлу НҰРТІЛЕУОВА,

С.Жаңғабылов атындағы орта мектептің тарих пәнінің мұғалімі

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.