Түркістанда маңғыстаулық Оңайгүл Тұржанның пьесасы сахналанды

Түркістанда 18-19 мамыр күндері маңғыстаулық ақын-драматург Оңайгүл Тұржанның "Қаламқас" пьесасы сахналанды, - деп хабарлайды mangystaumedia.kz сайты.

Қойылымның басты кейіпкері ХVIII ғасырда өмір сүрген қазақтың батыр қызы - Қаламқас Еселбайқызы. Сондай-пқ спектакльде қызу талқыға түскен киік аулау мәселесі де көрініс табады. Себебі қазақ қашан да киіктерді өзіне жақын тұтып, аялап, киелі жануар санайды.

Спектакльдің қоюшы-режиссері, белгілі хореограф, өнертанушы мәскеулік Константин Семенов қойылымда драма, поэтика, музыка, анимация, пластика бір-бірімен үйлесім тауып, заманауи техниканың барлық мүмкіндігін пайдаланған. Спектакль кейіпкерлерін толығымен Түркістан музыкалық драма театрының актерлері мен балет әртістері сомдаған.

- Спектакльдегі Қаламқас жаугершілік жылдары ер азаматтардың орнын жоқтатпай, жұртына жау тигенде ауылдағы қыздарды өзі бастап, шайқасып, батырлығымен көзге түседі. Аштықта ауыл-аймақты киік аулап асырап аман алып қалады. Кезекті бір киік қуған аласапыран кезде қапыда Қаламқастың өзі де құздан ұшып мерт болады. Сол далада қызыл көйлекті қыз елесі аңшылардың алдын кес-кестеп, киіктерді қорғаштап жүреді деген аңыз бар. Бәлкім, бұл Қаламқас апаның рухы шығар? Қойылым осы оқиғаға негізделген. Ал қойылымдағы "Киіктер биі" арқылы дала жануары адамзатқа тіл қатқандай әсерге бөледі, - делінген "Маңғыстаумұнайгаз" таратқан хабарламада.

Қаламқас кен орнының 45 жылдығына тұспа-тұс келген бұл қойылымның премьерасына "Қаламқасмұнайгаз" ӨБ-ның бастығы Мақсат Көмекұлы және қызметкерлері қатысты. Қаламқас кен орны қызметкерлері атынан поэма авторы Оңайгүл Тұржан мен Түркістан музыкалық драма театры ұжымына "Galleria Oner" студиясы суретшілерінің мұнаймен салған туындылары табысталды.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.