НЗМ-дегі дау-дамай: Ата-аналар балалардың денсаулығы үшін алаңдаулы

Назарбаев Зияткерлік мектебінде сапалы тамақтану мәселесі туындады. Ата-аналардың айтуынша, өткен жылдан бастап оқушылар мектеп асханасына барудан бас тартқан. Сонымен қатар, ата-аналар балалар тамақтан тарақандар мен шаш тапқанын айтты. Ал ата-аналардан құралған арнайы комиссиясы жарамдылық мерзімі өткен азық-түлікті анықтаған, деп хабарлайды mangystaumedia.kz.

Жеке кәсіпкер "Е" былтыр қараша айында НЗМ-де үш жылға мектеп тамағын ұйымдастыруға арналған тендерді жеңіп алды. Бүгінде мектепте 804 бала оқиды. Жатақханада тұратын балалар үшін күніне бес рет тамақтану ұйымдастырылған, қалған оқушылардың асханаға күніне үш рет баруға мүмкіндігі бар.

– Үш балам осы мектепте оқиды. Үлкен қызым 11-сыныпта оқиды. Бұрын тамақ жақсы ұйымдастырылып, денсаулығында ақауы бар студенттерге арналған диеталық дастархан бөлек болатын. Былтыр тағамның сапасы күрт төмендеп, асхананың санитарлық жағдайы нашарлады. Сондықтан балалар бұл жерден тамақ ішуді тоқтатты. Үлкен қызым арықтап кетті. Ол есінен танып қалғанша, біз оны оқушылардағы өтпелі кезеңмен байланыстырдық. Содан соң, ауруханаға барып, тексеруден өттік. Оның барлық көрсеткіштері төмендеп, гемоглобині де түсіп кеткенін анықтадық. Бұған дейін ол мектепте қалыпты тамақтанды, алайда денсаулығының күрт нашарлауы оның мектепте күндіз тамақтануды тоқтатуымен байланысты болды. Бір жылға жуық емделді, мен күнде үйде тамақ әзірлеп, осында тамақ әкелдім», - дейді НЗМ оқушыларының бірінің анасы Айман Биғожаева.

Ата-аналар 2023 жылдың қарашасына дейін балалар тамақтарды тек дәмсіз деп шағымданса, кейін ыдыс-аяқтан тарақандар мен шаштарды тапқанын айтады.

– Оқушылардың тамақтан әртүрлі бөгде заттарды тапқан жағдайлары фото, видеоға түсіріліп, хаттамалар жасалды. Арнайы комиссия мен мектеп басшылығы алдымен кәсіпкерге ескерту жасады, олар тамақтың сапасын жақсартуға уәде берді. Ақырында жағдай тіпті нашарлап кетті. Сондықтан желтоқсан айында ата-аналар кәсіпкердің шарттық міндеттемелерін тиісінше орындамағаны туралы Маңғыстау облысы әкімдігіне, облыстық прокуратураға, санитарлық-эпидемиологиялық бақылау департаментіне және «Атамекен» кәсіпкерлер палатасына ұжымдық шағым жазған. Тексеру барысында бақылаушы органдардың арасынан құрылған тәуелсіз комиссия біз көрсеткен заң бұзушылықтарды растап, бұл жайтқа көзжеткізді. Наурыз айында бір студент ауырып, асқазан-ішек жолы бұзылып, жедел жәрдеммен алып кетті. Сондықтан балалардың тамақтан улануын болдырмау мақсатында мектеп басшылығы кәсіпкермен келісімшартты біржақты бұзды. Әрине, кәсіпкер бұған қуанбады, қазір мектеппен соттасып жатыр, дейді НЗМ оқушыларының бірінің анасы Меруерт Хангереева.

Ата-аналар тамақтану сапасы балаларының денсаулығына кері әсерін тигізуі мүмкін деп алаңдайды, өйткені олар уақытының 80% мектепте, яғни таңғы 8-ден кешкі 6-ға дейін өткізеді.

– Келісімшарт мектеп пен кәсіпкерлік қызметпен айналысатын жеке тұлға арасында жасалғандықтан, біздің балалар осы келісім бойынша қызмет алушы болып саналады. Бұл жерде оқушылардың қауіпсіздігі мен денсаулығы туралы мәселе туындайды. 12-сыныпқа дейін бұлай жалғаса берсе, балаларда созылмалы аурулар – гастрит, панкреатит пайда болады. Бұл дегеніміз 18 жасқа толмаған бала өмірінің соңына дейін таблеткамен өмір сүруі керек дегенді білдіреді. Біз бұған жол бермейміз. Кәмелетке толмаған балаларымыздың заңды өкілдері ретінде олардың құқықтары үшін күресеміз. Кәсіпкерді нашар қызмет көрсетушілер тізіміне енгізу туралы өтінішпен шағым түсірдік, дейді ата-аналар.

Қазіргі уақытта балаларды тамақпен қамтумен тендер қорытындысы шыққанға дейін уақытша келісімшартпен басқа кәсіпкер айналысады. Ата-аналар оның қызметін де бақылап отыр. Әзірге ешқандай арыз-шағым түскен жоқ, оқушылар мектеп асханасына қайта оралды. Айтпақшы, мектептегі сапалы тамақ үшін күресте мектептің басты тірегі – белсенді ата-аналар.

Егер балаларыңыз білім алып жатқан білім ошағындағы асхана жұмысына көңіліңіз толмаса, Ақтау қаласы әкімдігінің жанындағы байланыс орталығына хабарласуыңызға болады.

– Біз үкіметтік емес ұйымдар, депутаттар, СЭС және денсаулық сақтау органдары өкілдерінің қатысуымен ведомствоаралық комиссия құрдық. Оны Ақтау қаласы әкімінің орынбасары Нұртас Сали басқарады. Қоңырау түскен бойда арнайы топ мектепке барып, ас мәзірін, санитарлық нормалардың сақталуын, тамақтың граммдары бекітілген нормаларға сәйкестігін тексереді, оқушылармен арыз-шағымдар бойынша әңгімелеседі. Байланыс орталығына – 33-64-54 телефоны арқылы хабарласуға болады», – дейді Ақтау қалалық білім бөлімінің басшысы Тоты Құлметенова.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.