3 мамырда спорт сүйер қауым велошабандоз Рәббім Байбозұлын Парижге шығарып салды, деп хабарлайды mangystaumedia.kz.
Іс-шара жағалаудағы амфитеатрда өтті. Шығарып салуға отбасы, достары, спортшылар және қала әкімдігінің өкілдері қатысты.
Велошабандоз Франция астанасына сапарын бастауға ештеңе кедергі болмайтынына сенімді. Ол Парижге тура екі айдан кейін жетемін деп жоспарлап отыр. Осы сапары барысында 9 елге баруды жоспарлап отыр, оның үшеуінде спортшыны сонда тұратын балалары мен немерелері күтеді.
«Ауа райы қандай болса да, мен үшін кедергі емес, өйткені бірнеше жылдық тәжірибем бар. Велосипедпен Қазақстанның түкпір-түкпірін араладым, тіпті тау жоталарын бағындырдым деуге болады. Қиын болуы мүмкін, себебі - бейтаныс рельеф және жолды білмеу. Бірақ мұндай жағдайлар үшін әрқашан карталар мен мен нұсқаулық бар. Менің мақсатым – Париждегі Олимпиада ойындарына көрермен ретінде қатысу. Әзербайжаннан бастап 9 мемлекетті аралауды жоспарлап отырмын. Жолға көп зат алмадым, багажымда небәрі 10 келі зат бар. Балаларым мен немерелерім мені Еуропада – Германия мен Францияда күтіп отыр. Олардың қолдауы мен үшін маңызды. Ал елге қайтарда ұшақпен қайтамын», - деп жоспарларымен бөлісті Маңғыстау облыстық қоғамдық кеңесінің мүшесі, велошабандоз Рәббім Байбозұлы.
Рәббім Байбозұлы жиналғандардың барлығына уақыт бөліп келіп, қолдау білдіргендері үшін алғысын білдірді.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
