Маңғыстаулық студенттер Республикалық кәсіби шеберлік байқауында топ жарды

Маңғыстауда 3 күнге созылған «WorldSkills Kazakhstan 2023» VIII Республикалық кәсіби шеберлік чемпионаты өз мәресіне жетті, деп хабарлайды mangystaumedia.kz сайты Қоғамдық коммуникация орталығына сілтеме жасап.

Аталған жарысқа еліміздің түкпір-түкпірінен барлығы 545 студент қатысты. Олардың 32-сі — маңғыстаулықтар.

Қатысушылар 30 құзыреттілік бойынша бақ сынап, өлке намысын қорғады.

Республикалық чемпионатта колледж қабырғасында алған теориялық білімін тәжірибе жүзінде шебер ұштастыра білген шын жүйріктердің қанжығасы майланып, қоржындары медальмен толықты. Олардың арасында 3 алтын, 1 күміс, 1 қола, 7 медальонды жеңіп алған маңғыстаулық студенттер де бар.

Алтын жүлдені Маңғыстау индустриалды техникалық колледжінің студенті ( «Графикалық дизайн» құзыреттілігі бойынша) Ақмерей Сәрсенғали, Маңғыстау индустриалды техникалық колледжінің студенті («Өнеркәсіптік автоматика» құзыреттілігі бойынша) Әлібек Алдамжаров иеленді. Қарақия кәсіптік колледжінің студенті ( «Шанақ жөндеу» құзыреттілігі бойынша) Жүсіп Теміралиев иеленді.

Күміс медальді Маңғыстау туризм колледжінің студенті («Наубайхана ісі» құзыреттілігі бойынша) Тимур Байаманов, қола жүлдені Маңғыстау туризм колледжінің студенті («Мейрамхана ісі» құзыреттілігі бойынша) Арайлым Узбекова алды.

Ал «Мобильді робототехника» құзыреттілігі бойынша Досбол Джарасов, Нурлан Жаксылыков – Бейнеу политехникалық колледжінің студенттері, «Инженерлік графика САД» Назерке Құралбай – Х.Өзбекғалиев атындағы жоғары политехникалық колледжінің студенті, «Кірпіш қалау» Оралбек Қошқарбаев – Жаңаөзен қызмет көрсету және жаңа технологиялар колледжінің студенті, «Құрғақ құрылыс және сылақ жұмыстары» Заңғар Айткенұлы – Түпқараған гуманитарлық-кәсіптік колледжінің студенті, «Сантехника және жылыту» Незгода Иван–Н.Бекбосынов атындағы Маңғыстау энергетикалық колледжінің студенті, «Кескіндеме және сәндік жұмыстар» Амина Сенбі – Жаңаөзен қызмет көрсету және жаңа технологиялар колледжінің студенті құзыреттіліктері бойынша медальдарға ие болды.

Айта кетейік, үздік тәжірибелер мен кәсіби стандарттарды енгізу, техникалық және кәсіптік білім беру жүйесінде сараптамалық қоғамдастықты дамыту мақсатында өткен республикалық чемпионаттың жеңімпаздары 2024 жылғы 10-15 қыркүйек аралығында Францияның Лион қаласында өтетін WorldSkills халықаралық чемпионатына қатысады.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.