Маңғыстауда сыбайлас жемқорлыққа қарсы іс-қимыл мәселелері қаралды

Ақтауда облыс әкімі Нұрдәулет Қилыбайдың төрағалығымен сыбайлас жемқорлыққа қарсы іс-қимыл мәселелері жөніндегі комиссия отырысы өтті, - деп хабарлайды mangystaumedia.kz сайты облыс әкімінің баспасөз қызметіне сілтеме жасап.

Комиссия отырысында кәсіпкерлікті қолдау саласында жұмыс істейтін ұйымдардың қызметі қаралды.

Отырыс барысында бірінші болып сөз алған “Даму” кәсіпкерлікті дамыту қоры» АҚ-ның Маңғыстау облысы бойынша өңірлік филиалының директоры Берік Қадыров Даму қоры кәсіпкерлерге қаржылық қолдау көрсетіп жатқанын жеткізді.

Айта өтейік, «Даму» Қорының барлық қызметі – тегін. Қор бөгде кеңесші, делдалдармен жұмыс істемейді. Қор арқылы субсидия немесе кепілдік алу үшін ешкімнің ақша талап етуге немесе дәметуге құқы жоқ. Себебі өтінім беруден бастап, шартқа қол қоюға дейінгі барлық қызмет цифрланған.

Ал, “Аграрлық несие корпорациясы” АҚ-ның облыстық филиалының директоры Ернат Каковтың мәліметінше, филиал «Агробизнес», «Агробизнес НС», «Еңбек», «Жас ұрпақ» Жастар бастамасын несиелендіру бағдарламалары бойынша несиелендіру жұмыстарын жүргізуде.

Жиын барысында облыстық кәсіпкерлік және сауда басқармасының басшысы Дастан Мұраталиев әлеуметтік маңызы бар азық-түліктердің баға тұрақтылығын қамтамасыз етудегі атқарылып жатқан сыбайлас жемқорлыққа жол бермеу шаралары туралы айтты.

—Облыста әлеуметтік маңызы бар азық – түлік тауарларының бағасына қатысты арыз – шағымдарды қабылдау бойынша байланыс орнатылған. Өңірдегі азық – түлік тауарларының бағаларына және олардың қорларына күнделікті мониторинг жүргізілді. Апта сайынғы негізде әр аудан және қала орталықтарында ауыл шаруашылығы тауарын өндірушілері мен көтерме жеткізушілерінің – 182 жәрмеңкелері өткізілді, - деді Дастан Мұраталиев.

Аймақ басшысы Нұрдәулет Қилыбай сыбайлас жемқорлыққа мүлдем жол берілмеу қажеттігін атап өтіп, бірқатар тапсырмалар жүктеді.

-Сыбайлас жемқорлыққа қарсы күресте ешқандай заңсыздық болмауы керек. Біз бәріміз заң алдында теңбіз, мұны бәрі білуі тиіс. Халықтың ең бірінші кезекте сұрайтыны - ол азық-түлік, соның ішінде әлеуметтік маңызы бар тағамдардың бағасын тұрақтандыру. Атқарушы билік құқық қорғау органдарымен бірлесе көтерме саудамен айналысушылардың жұмысына мониторинг жүргізіңіздер. Азық-түлік бағасын еселеп өсіріп отырғандар болса анықтап, тиісті шарасын алу керек. Біздің басты мақсатымыз - халықтың көп тұтынатын ас-суының бағасының негізсіз көтерілуіне жол бермеу,-деді Нұрдәулет Қилыбай.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.