Маңғыстауда 490 көлік арнайы тұраққа жабылды

Маңғыстау облысында жол-көлік оқиғаларының алдын алу бағытында атқарылып жатқан іс-шараларға қарамастан биыл 1 ақпаннан бастап облыс аумағында 18 жол-көлік оқиғасы тіркелді. 17 адам жарақат алып, өкінішке орай 8 адам қайтыс болды. Бұл туралы Қоғамдық коммуникация орталығында өткен брифингте Маңғыстау облысы ПД ЖПҚБ бастығының орынбасары Тілекберген Селбаев айтты, деп хабарлайды mangystaumedia.kz.

Спикердің айтуынша, ЖКО-ның басты себептері — жылдамдық режимін сақтамау, маневр жасау ережелерін бұзу, қарсы жолаққа шығу, аударылу, жаяу жүргіншілерді байқамау.

Маңғыстау облысы аумағында ақпан айында “Қауіпсіз жол” жедел-профилактикалық іс-шарасы өтіп жатыр.

- Іс-шараның басты мақсаты - көлік жүргізушілерінің арасында тәртіпті арттыру, жол-көлік оқиғаларының салдары мен себептерін облыс тұрғындарына жеткізу. Жедел профилактикалық іс-шарасының 18 күнінде полиция департаменті, қала-аудан басқарма, бөлім қызметкерлері 8 160 әкімшілік құқықбұзушылықтар анықтады. Сонымен қатар, 490 көлік арнайы тұраққа жабылып, 299 автокөліктен мемлекеттік тіркеу нөмірлері тәркіленіп алынды, - деді Тілекберген Селбаев.

Сондай-ақ, спикер облыс тұрғындары мен қонақтарын жолда қауіпсіздік қағидаларын сақтауға шақырды. Тыйым салынған жерден жүгіріп өту оңай болғанымен, оның зардабы қайғылы екенін, жылдамдық режимі мен қауіпсіз арақашықтықты сақтау маңызын атап өтті.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.