Бүгін, 5 қазанда облыс әкімі Нұрдәулет Қилыбай мұғалімдер күніне орай ұйымдастырылған салтанатты шараға қатысып, өңірдің білім саласының дамуына үлес қосып жүрген педагогтерді, сала ардагерлерін марапаттады, - деп хабарлайды mangystaumedia.kz
Салтанатты шараны ардагер ұстаз Ізбасаров Оралбай ашып беріп, әріптестерін төл мерекемен құттықтады. Аймақ басшысы Нұрдәулет Қилыбай өз сөзінде мұғалімдердің бала тәрбиесіндегі рөлі мен білім берудегі зор еңбегін атап өтіп, жауапты қызметін жоғары бағалады.
- Әлемдегі ең асыл мамандық иесі – мұғалім. Біліктілігі жоғары, беделі мықты, мәртебесі биік мұғалімдерсіз мемлекеттің жарқын болашағын елестету қиын. Мемлекет басшысы ұстаз мәртебесін көтеру туралы үнемі айтып келеді. Расында қоғамда ұстазды ұлықтауымыз, дәріптеуіміз керек. Соңғы жылдары мұғалімдердің жалақысы артып, мектептердің материалдық-техникалық жабдықтау мәселесі жақсаруда. Маңғыстау өңіріне келсек, көптеген жобалар жүзеге асырылып жатыр. Биылғы оқу жылынан бастап, білім сапасын арттыру мақсатында 50 мектепте «Отпан» бағдарламасы іске қосылды. Алдағы уақытта үш ауысымды білім беруді жою мақсатында «Жайлы мектеп» жобасы аясында 22 мың орындық 21 мектеп салынады. Бұл мектептерде талапты, қабілетті жастар мен үздік педагогтер қызмет атқарады.
Облысымызда 15 жылға жуық құқық бұзушылық тіркелмеген ауылдар бар. Біздің мақсат осындай елдімекендердің санын арттыру. Бұл – ұстаздар мен ақсақалдар институтының арқасы. Маңғыстау облысының білім саласына өлшеусіз үлес қосып жүрген әрбіріңізге алғысымыз шексіз. Еңбектеріңіз жемісті, шәкірттеріңіз білімді болсын, – деді облыс әкімі Нұрдәулет Қилыбай.
Салтанатты шарада аймақтың білім саласына үлес қосқан 12 педагог «Еңбек ардагері», 31 мұғалім «Ы.Алтынсарин» төсбелгісімен марапатталды. Сонымен қатар, 2 ұстаз «Білім беру ісінің құрметті қызметкері» төсбелгісіне ие болды. 15 мұғалім Маңғыстау облысы әкімінің Құрмет грамотасын алды. Маңғыстау облысының білім беру саласына қосқан үлесі үшін 12 ұстаз 500 мың теңгеден марапатталды.
Айта кетсек, өңірдің білім саласында айтарлықтай жетістіктер бар. Мәселен, Түпқараған ауданының Ақшұқыр мектеп-гимназиясы, Мұнайлы ауданының Шоғы Мұңалұлы атындағы №5 жалпы білім беретін мектебі және Түпқараған ауданындағы Ғұбайдолла Айдаров атындағы №1 мектеп-лицейі «Ең үздік ауыл мектебі – 2024» атағын иеленді.
Шара соңы жергілікті өнерпаздардың мерекелік концертіне ұласты.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
