Қолын катетермен «күйдірген»: Ақтаулық тұрғын медицина қызметкерлеріне шағымданды

Екі жасар қыздың туыстары облыстық балалар ауруханасының медицина қызметкерлерінің әрекетіне шағымданды. Ауруханаға жүрек ауруымен түскен 2 жасар қызға катетер арқылы инъекция қойған. Инъекция курсы аяқталғаннан кейін бір күн өтсе де дәрігерлер катетерді алып тастамаған, деп хабарлайды mangystaumedia.kz.

«Осы 4 күннің ішінде ол қолындағы катетермен жатты.Катетерді 3 күннен кейін алып тастау керек еді. Сіңілім ауырғаннан жылаған. Анам бірнеше рет катетерді алып тастауды сұраған. Бірақ дәрігерлер де, медбикелер де құлақ аспаған. Кеше түнде сіңілім қатты жылай бастаған соң анам медбикелерден катетерді алып тастауды өтінген. Катетерді алған кезде медбикелердің өздері де шошып кетті. Өйткені сіңілімнің катетер тұрған қолында қан ұйып, тесік пайда болып, қолы күйіп қалған. 4 күн бойы сіңілім осындай азапқа шыдаған. 2 жасар кішкентай қыз онсыз да дәрігер мен медбикелердің немқұрайлығынан өздігінен тыныс алмайды. Кінәлілерді жазалауды және осы әрекеті үшін жауап беруді сұраймыз", - деп жазды зардап шеккен қыздың апасы.

Облыстық көпсалалы балалар ауруханасы науқастың шағымдарына жауап берді.

«Бұл жағдайдан аурухана басшылығы мен медицина қызметкерлері хабардар. Баланың туа біткен жүрек ақауына байланысты қан айналым жүйесінде өзгеріс болған соң және организмде оттегі жетіспеушілігі салдарынан перифериялық қан тамырларда қоректену бұзылысы байқалады. Сондықтан перифериялық қан тамырға қойылатын катетер әр науқас баланың организміне әр түрлі әсер етеді, кейде тері, тері асты қабатында жергілікті қабыну реакциясын тудырады. Алайда бұл жағдайда ешқандай да флебит, операциялық араласуды талап ететін жұмсақ тіндердің қабыну процесі (флегмона, абсцесс) жоқ. Дәрігерлер қарап, хирург - дәрігер кеңес берді. Анасына түсіндіру жұмысы жүргізілді.

Науқас жүрегіндегі туа біткен ауруына байланысты есепке алынды. Санавиация ұйымдастырылып, Республикалық орталық деңгейінде операциялық емге жолдама берілген, бірақ ата-анасы заңды түрде бас тартқан. 30.11.2023ж Республикалық орталықтан келген кардиолог және кардиохирург мамандарына көрсетілді.

Шағым туындаған жағдайда науқастарды қолдау қызметі және ішкі аудит бойынша байланыс телефоны: 8(7292)210-240, Денсаулық сақтау басқармасының регионалды колл-орталығына 8(7292)303060 хабарласуы мүмкіндігі бар екенің қаперіңізге береміз. Ішкі аудит дәрігер анықтап, жауап беретін болады. Тікелей НҚҚ және ІА бөліміне келіп, шағымыңызды қалдыра аласыз», - делінген облыстық денсаулық сақтау басқармасының хабарламасында.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.