Ақтауда уақытылы қоқыс контейнерлерін тазаламаған компаниялар айыппұл төлейді. Бұл туралы қалалық санитарлық-эпидемиологиялық бақылау басқармасының басшысы Асима Жарылғасова мәлімдеді, - деп хабарлайды mangystaumedia.kz сайты.
Ақтауда қоқыс шығарушы 8 компания бар. Алайда аталған мекемелерге тұрғындар тарапынан қоқыстың уақытылы шығарылмауына байланысты наразылықтар көбейіп кетті. Ақтау қалалық тұрғын-үй коммуналдық шаруашылық бөлімі қоқыс шығарушы компаниялардың уақытылы қоқыс контейнерлерді тазаламауы, күтіп ұстамауы туралы дәлелді материалдарды қалалық санитарлық-эпидемиологиялық бақылау басқармасына жіберетіндігін айтты. Содан кейін қоқыс шығарушы компанияларға айыппұл түріндегі әкімшілік жаза қолданылады.
- Қоқыс уақытылы тазаланбаса, шығарушы компанияларға айыппұл түріндегі әкімшілік жаза қолданылады. ҚР Әкімшілік құқық бұзушылық туралы Кодексі 802-бабының негізінде әкімшілік хаттама толтырылып, ҚР Әкімшілік құқық бұзушылық туралы Кодексі 425-бабының халықтың санитариялық-эпидемиологиялық саламаттылығы саласындағы заңнама талаптарын, сондай-ақ гигиеналық нормативтердi бұзу, яғни қоқысты уақытылы шығармау бойынша қоқыс шығарушы компаниялар 230 айлық есептік көрсеткіш мөлшерінде, яғни 849 мың теңге көлемінде айыппұл төлейді немесе сотпен компанияны жабуға дейін шешім қабылданады, - деді Ақтау қалалық санитарлық-эпидемиологиялық бақылау басқармасы басшысы Асима Жарылғасова.
Сонымен қатар қалада кәсіпкерлік нысандар қоқысын тұрғындардың қоқыс контейнеріне тастайды. Аталған мәселеге байланысты жауаптылар кәсіпкерлік нысандардың міндетті түрде қоқыс шығарушы компаниялармен келісімшарты болуы керектігін айтты.
- Кәсіпкерлік нысандар атап айтқанда дүкен иелері, кафелердің міндетті түрде қоқыс шығарушы компаниялармен келісімшарты болуы керек. Кәсіпкерлер қоқысты тұрғындардың қоқыс контейнеріне тастауына тыйым салынады. Кәсіпкерлік нысандардың (дүкен, кафе) бөлек қоқыс контейнері болуы керек. Сондай-ақ қоқыс шығарушы компаниялардың контейнерлері санитарлық талаптарға сай болу керек, - деді Ақтау қалалық санитарлық-эпидемиологиялық бақылау басқармасы басшысының орынбасары Лаура Әбдіғалиева.
Жауаптылардың айтуынша, қоқыс шығарумен айналысатын компаниялардың контейнерлері герметикалық болуы қажет және қақпағы болуы керек. Бұл контейнерлер босатылғаннан кейін міндетті түрде тазаланып, дезинфекциялануы керек.
Сондай-ақ контейнерлерді қойғанда олардың арақашықтығын сақтаған жөн. Контейнерлер үш жағынан 1,5 метрдей қоршалып, бетонды жерге орнатылуы керек. Бұдан бөлек әрбір қоқыс шығарушы компанияның қоқыс шығару қызметін жүргізу құқығына ие екендігін растайтын рұқсат құжаты болуы керек. Бұл құжатты кез келген кәсіпкерлік субъектісі «E-license» арқылы онлайн ала алады.
Ақтау қалалық санитарлық-эпидемиологиялық бақылау басқармасы мен қалалық тұрғын-үй коммуналдық шаруашылық бөлімі тұрғындардан қоқыс шығару қызметі үшін төлемді компанияларға уақытылы төлеуді сұрайды. Жалпы қала тұрғындарының қоқыс шығарушы компанияларға қарызы 283 млн 996 мың теңге.