Қызыл кітапқа енген арқарды өлтірген Маңғыстау тұрғыны ұсталды

Маңғыстау облысында Қызыл кітапқа енген арқарды атқан браконьерлер ұсталды. Бұл факті бойынша қылмыстық іс қозғалды, - деп хабарлайды mangystaumedia.kz сайты.

29 қараша күні «Қызылсай» табиғи паркінің инспекторлары «Жабайұшқан» мемлекеттік табиғи паркінің басшысы Жұлдызбек Есенғалиевтің жетекшілігімен рейд өткізді. Нәтижесінде Бөрібас асуында «Nissan Patrol» автокөлігін байқаған, - деп хабарлайды mangystaumedia.kz сайты.

Мемлекеттік инспекторлар көлікті тексеріп, одан Қызыл кітапқа енген арқардың өлексесі тапты.

- Жүк салғышта бұдан басқа 11 оқпен 7,62 калибрлі Вепр-307 аңшылық карабині, 26 оқпен 12 калибрлі Франчи тегіс ұңғылы аңшы мылтығы, сонымен қатар екі аңшылық пышағы болған. Браконьерлік жасады деген күдікке ілінген азамат Жаңаөзен қаласының тұрғыны болып шықты, - деді Жұлдызбек Есенғалиев.

Бұл дерек Маңғыстау аудандық полиция бөлімінде тіркелді.

- Қазіргі таңда ҚР Қылмыстық кодексінің 337-бабы (Жануарлардың сирек кездесетін және құрып кету қаупі төнген түрлеріне, сондай-ақ тыйым салынған жануарларға қатысты заңсыз аң аулау, оның ішінде атыс қаруын, көлік құралдарын пайдалана отырып жасау) бойынша тергеу жүріп жатыр) – деді Маңғыстау аудандық ПБ.

Мемлекеттік инспекторлар арқардың табиғатты қорғау ұйымдарында қорғалатынын және Қызыл кітапқа енгізілгенін еске салды.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.